مومیکا مالمۆ ئاگر دەێد.. رویوەڕویبوین لە گەورەترین شارەیل سوید لەبان سزانن قورئان
رویوەڕویبوین دویای ئەوە دەسوەپی کرد کە سەلوان مومیکا چالاکوان دژە ئیسلامی رووژ یەکشەممە چاپیگ قورئان سزان و جەماوەریگ تویڕە تەقەلا دان ریگری لەلی بکەن، لە وەختیگ پولیس چەن کەسیگ دەسگیرکرد، کە پولیس وت: لەلای کەمەو سێ کەس دەسگیر کریانە.
پولیس شار مالمۆ راگەیان: سەنگواران کریانە، وەگەرد ئەوەیش خوەینشاندەرەیل ئاگر دەیان ماشین دانە، و گەراجیگ ژیرزەمینیی سزاننە و کردەوەیان وە "ئاژاوەیگ تونوتیژ" دادە قەڵەم.
شەوەکی ئمڕوو دووشەممە، جەماوەریگ تویڕە کە فرەیان گەنج بوین، تایەر و جیماگەیل سزانن و بڕیگیش پاسکیل و ماتۆڕسکیڵ کارەبایی فڕە دان و تەیمانەیل شکانن لە گەڕەک ڕۆزنگارد لە شار مالمۆ کە لە ماوەی گوزەشتە کارەیلیگ هاوشیوە وەخوەی دیە، چەن لافیتەیگ بەرزەو کریایە کە پەیوەندی وە سزانن قورئانەو داشتنە.
ئەفسەر پۆلیس پێترا ستیکۆنکۆ وت: "من فامم کە گردەوبوینیگ گشتی جویر یە هەس قایمیگ بەرزەو کەێد، بەڵام نیەتوەنین وەرگەی بشیون و تونوتیژانە بگریمن جویر ئەوەانەگ دیمنە".
ستێنکولا وتیش: فرە جی داخە کە جاریگ ترەک کردەوەی تونوتیژی و شیوانن لە ڕۆزنگارد دوینیمن.
لە چەن مانگ گوزەشتە، مومیکا، پەنابەریگ عراقییە، لە زنجیرەیگ ناڕەزایەتی دژ وە ئیسلام، قورئان پیس کرد، کە فرەیان لە ستۆکهۆڵم بوین و فرەیگ لە وڵاتەیل موسڵمان تویڕە کرد، پولیس سوید وە دەسپیچگ ئازادی رادەربڕین ری وە کارەیلی دا.
سزانن قورئان ناڕەزایەتی و تویڕەیی وڵاتەیل ئیسلامی لەلی بویەو، و پەلامار لەبان نوێنەرایەتییە دیپلۆماسییەیل سوید و پەلامار تونڕەوەیل ئیسلامی لەلی کەفتەو.
