مردن وه كۆرۆنا ره‌سيه 75 هه‌زار و ئۆرپا و ئه‌مريكايش فيشتر له‌لى زه‌ردمه‌نن
شه‌فه‌ق نيوز/ دويايين ئامار و شماره‌يليگ ئه‌وه ده‌رخست ك به‌رزه‌وبوين شماره‌ى حاڵه‌ته‌يل مردن له‌ئه‌نجام تويشهاتن وه ڤايرۆس كۆرۆنا له جه‌هان ره‌سيه‌سه نزيكه‌ى 75 هه‌زار حاڵه‌ت و شماره‌ى تويشهاتگه‌يليش ره‌سيه‌سه مليۆنيگ و 348 هه‌زار كه‌س.
وه‌گوورى دويايين ئامار زانكۆى "جونز هوبكينز" ئه‌مريكى، وڵاته‌يل يه‌كگرتگ له سه‌ره‌تاى ده‌وڵه‌ته‌يل جه‌هان بويه له‌ڕوێ شماره‌ى تويشهاتن وه ڤايرۆس كۆرۆنا و زياتر له 368 هه‌زار حاڵه‌ت تائيسه له‌ورا تۆمار كرياگه.
وه‌ل ئه‌وه‌يشا ئسپانينا له پله‌ى دويه‌م ئه‌ياد ك شماره‌ى تويشهاتن له‌تى ره‌سيه‌سه 136 هه‌زار حاڵه‌ت و له‌شوون ئه‌ويش ئيتاڵيا وه پله‌ى سێيه‌م وه 132 هه‌زار حاڵه‌ت و له‌شوون ئه‌ويش ئه‌ڵمانيا وه 103 هه‌زار حاڵه‌ت و له دوياى ئه‌ويش فره‌نسا وه پله‌ى په‌نجه‌م ك شماره‌ى تويشهاتن وه كۆرۆنا له‌تى ره‌سيه‌سه 100 هه‌زار حاڵه‌ت.
