ئەمریکا پیشکەشکردن ڤیزا تونترەو کەێد و وە وەشکین سۆشیال میدیا بەسێدەی
شەفەق نیوز/ ئمڕوو چوارشەممە، مارکۆ ڕوبیۆ، وەزیر دەیشت ئەمریکا، ڕێنمایی نوویگ دەرکرد و داوا لە باڵیۆزخانەیل ئەمریکا کرد لە گشت جیهان، وە هویردی لە ناوەڕۆک پلاتفۆرم سۆشیال میدیا ئەرا بەشیگ لە داواکارەیل ڤیزا وەتایبەتی خوەنەوارەیل و کەسەیل ترەک بنووڕن، یەیش لە چوارچیوەی ریکارە تونەیل کە گومان لە رەخنەگردن لە ئەمریکا یا ئیسرائیل هابانیان.
وەگورەی ئەوەگ رووژنامەی نیویۆرک تایمز لە زار وەرپرسیگ ئەمریکی بڵاوی کرد، ئی رێنماییە لە ٢٥ ئازار ئەرا نوێنەرایەتییە دیپلۆماسییەیل ئەمریکا کلکریاس، ئەوەیش دویای چەن هەفتەیگ لە واژووکردن فەرمانە جیوەجیکاریەیل دۆناڵد ترەمپ، سەرۆک ئەمریکا وە ئامانج تونکردن کۆنترۆڵ بیانییەیل، لە ناویان ئەوانەگ هاتی "هەڵوێست دوژمنکارانە" وەرانوەر هاوڵاتیەیل ئەمریکی یان دامەزراوە و کولتوری ئەمریکی دیرن.
هەرلیوا فەرمانە جیوەجیکاریەیل ترەمپ ریکارەیل تونیگ وەرانەور ئەو چشتە کە وە "دژە یەهود" باسی کرد لەخوەی گرێد، لەوانە دەرکردن ئەو خوەنەوارەیل بیگانە کە بەشداری لە ناڕەزایەتییەیل زانکۆیل کردنە دژوە جەنگ ئیسرائیل لە کەرت غەززە.
وەگورەی ئەو پەیامە کە ڕوبیو کلی کردگە، بایەسە کارمەنەیل باڵیۆزخانەی ئەمریکا بەشیگ لە داواکارەیل ڤیزا ئەرا یەکەی ریگریکردن لە ساختەکاری کلبکەن تا وەشکین ناچاری ئەرا ئەکاونتەیلیان لە پلاتفۆرم سۆشیال میدیا ئەنجام بیەن.
لە پەیامەگە ئاشکرا کرد کە وەشکینەگە ئەو کەسەیلە گرێدەو کە گومان کریەێد پەیوەندی وە تیرۆرەو بیاشتوون یا لە ناوەین ٧ تشرین یەکەم ٢٠٢٣ تا ٣١ ئاب ٢٠٢٤ ڤیزەی خوەنەواری یا ئاڵوگۆڕکردن داشتنە، یان لەو ماوە ڤیزاگەیان وەسەرچگە.
ڕێنماییەیل نشان دەن کە یەکیگ لە ئامانجە سەرەکییەیل ئی ریکارە ڕەتکردن داواکاریی ڤیزە کە لەلایەن ئەو خوەنەوارەیلە پیشکەش کریەن کە هاوسووزی خوەیان وەرد فەلەستینییەیل نشان دانە لە مەوقەی جەنگ ئیسرائیلی.
هەرلیوا لە پەیامەگە هاتگە کە ئەگەر ڕەفتار یا لێدوانەیلیان لە ری ئۆنلاین هەڵوێست دوژمنکارانە وەرانوەر ئەمریکا نشان بیەن، لەوانەیش حکومەت و دامەزراوەیل و بنەما دامەزرنەرەیل، هاتێ داواکارەیل ڤیزە وەپییان نەیریەێد.
لە دیداریگ وەرد کەناڵ سی بی ئێس نیوز لە ١٦ی ئازار، ڕوبیۆ وت "ئیمە ئەو کەسەیلە نیەخوازیمن لە وڵاتەگەمان تاوان ئەنجام بیەن و ئاسایش نیشتمانی یا بیوەیی گشتیمان بشیونن. هەر وەی سادەییە، وەتایبەتی هەناێ باس لە هاتن میوانەیل وە ڤیزەی وەختانە کریەێد".
ئی ریکارەیلە لە چوارچیوەی سیاسەتیگ فراوانتر تیەن کە ئیدارەی ترەمپ ئەرا بەرزکردن وەشکینە ئەمنییەیل لەبان ببگانەیل پەسەنی کردگە، یەیش لە وەختیگ کە مشتومڕ لەبان کاریگەرییەیل ئی سیاسەتەیلە لەبان ئازادییە ئەکادیمییەیل و ئازادیی راوان تیەرێد.
