ئەمریکا رخبەرترین بار مووشەکی دەێدە ئۆکرانیا
شەفەق نیوز/ بینتاگۆن کلکردن دووان لە سیستەم مووشەک "ناسامز" زەوی ئاسمانی ئەرا ئۆکرانیا راگەیان، وەگەرد رادار دژوە تووپ، لە گام نوویگ ک وەدڵ رووسیا نییە.
نەگ هەر یە، ک بارەگە ١٥٠ گولەی تووپ عەیار ١٥٥ ملیمەتر هاناوی. یە نووترین بار چەک ئەمریکاس ئەرا ئۆکرانیا، ئەرا زانیاری ئەمریکا بارەیلیگ وەرجە جەنگەگە لە ٢٤ فێبرایەر گوزەشتە ودویای ئەوەیش کلکردیە.
وەزارەت وەرگری ئەمریکا وت: نووترین بار دەسمیەتی ئەمنی، هەمیش گولەی سیستەم مووشەکی خاوەن جویلەی باڵا (هیمارس) هاناوی. دەسمیەتیەیل سەربازی لە واشینتۆن ئەرا کیێڤ لە سەرەتایی جەنەگە تا ئیسە رەسیەسە نزیکەی ٧،٧ ملیار دۆلار.
پسپۆڕەیل ئویشن ئی بار دویایینە بارە لە دەسمیەتیەیل سەربازی ئەمریکا ئەرا کیێڤ، رخبەرترین و گرنترین بارە لە سەرەتای جەنەگە تا ئیسە. ئەلیکساندەر ئەرتامتۆف پسپۆڕ سەربازی رووسی ئویشێد: واشینتۆن وەگشت هیزیگ خوازێد ماوەی جەنگەگە درویژەو بکەێد وهاز رووسیا کەمەو بکەێد.
