یەک مانگ لە ناڕەزاییەیل ئیران.. دەسەڵات پەلاماری وەبان ناوچەیل کورد خەسەو کەێد
شەفەق نیوز/ چالاکوانەیلیگ ئیرانی، ئمڕوو سێشەممە، خەوەردان لە نووەبوین ئەنجامکردن ناوچەیل کورد لە خوەرئاوای وڵاتەگە لەلایەن دەسەڵاتەیل ئیران، لەوەختیگ وەرپرسەیلیگ ئیرانی ئەو ناڕەزاییەیل کریکاری دویایینە کردنە دەسپیچگ ک وەبوونی "کرا" بویە نەگ لەبان دەسەڵات.
چالاکوانەیلیگ ئەرا ئاژانس ئەسوشیتد پڕس وتن: ئیران هەڵمەت کوشتن و بڕین لەبان ناوچەیل کورد خەسەو کرد، وەگەرد بەرزەوبوین ناڕەزاییەیل دویای کوشیان مەهسا ئەمینی لەلای پۆلیس ئەخلاق.
پارێزگای کوردستان
پۆلیس دژە ئاژاوە، لەلای کەمەو لەناو یەک گەڕەک لە شار سەنندج، پایتەخت پارێزگای کوردستان تەقە کریایە، باوجی دەسەڵاتەیل ئیران دان وە نووەبوین کوشتن و بڕین لەورا نەیانە.
ریخریاگ "هەنگاو" ئەرا ماف مرۆڤ لە کوردستان کرتەیلیگ بڵاو کرد ک نشان دویکەڵ دەێد لەناو یەکیگ لە گەڕەکەیل سەنندج هەڵسێد، وەگەرد ژنەفتن دەنگ تەقەی تفەنگ و قیژەی کەسەیلیگ لە شارەگە.
پارچە ڤیدیۆییگتر نشان ئەندامەیل دژە ئاژاوە دەێد، تفەنگ ڕاو هاپیان، و وەشان ماشینیگ پۆلیس ری کەن، و تەقە لە ماڵەیل کەن.
ناوەند ماف مرۆڤ لە ئیران ک بارەگای ها نیویۆرک، پارچە ڤیدیۆیگ بڵاو کرد نشان کەتیبەیگ لە هیزەیل ئەمنی وەکووڵ ماتوورسکڵ لە سەنندج جویلە کەن.
ناوندەگە وت: وتنە شویشەی ماشینەیل لە گەڕەک بەهاران لە سەنندج شکاننە.
وەرپرسیگ ئیرانی وت: گوایە ئەو مانگردنە لەلایەن کریکارەیل کارخانەی پترۆکیمیایی لە شار عسلەویە پەیوەندی وە تویڕەییان لەبان کراگە دیرێد، وبەشیگ لە ناڕەزاییەیل بان مردن مەهسا ئەمینی نییە.
ئاژانس یانەی پەیامنارەیل گەنج ئیرانی خەوەریگلیگ لە زوان عەلی هاشمی وەرپرس بڵاو کردن ک ئویشێد" بەشیگ لە ئیرانیەیل خوازن ناڕەزاییەیل کراکارەیل وەشیوەی بەدیگ وەکار بارن، وە وتن دروشمەیل دژوە حکومەت.
پارچە ڤیدیۆیگ لەبان تویتەر نشان دا ک دەیان لە کریکارەیل ری وەرەو کارخانەی پترۆکیمیایی بوشەهر لە عەسولیە بەسن، و ئویشن" مەرگ ئەرا دیکتاتۆر.
لە تەهران و شارەیلیگتر، پارچە ڤیدیۆییلیگ لەبان ئەنتەرنێت بڵاو کریا، ژنەیل ئیران نشان دەێد ک وەبی لەچگ سەر لەناو جادەیل جویلە کەن، وبەشیگیان وەردەوەردە وەرد هیزە ئەمنیەیل کەن و ئاگر لەناو جادەگە رووشن کەن، هەرچەن دەسەڵاتەیل پەک ئەنتەرنێت خستنە.
یە چوارەم هەفتەس لەبان یەک ناڕەزاییەیل لە ئیران وەردەوامە، و ریخریایەیلگ ماڤپەروەری وتن : ١٨٥ کەس لەلای کەمەو، ١٩ ناخاتە هاناویان کوشیانە، و سەدانیش زەخمدار و دەسوەسەر کریانە.
