ئەمەل سووری، رەسی وە بریتانیا
شەفەق نیوز/ "ئەمەل" ماڵبووکان سێ و نیم متری سووری ک جوور زاڕوو پەنابەرێ سازریاگە و وە سەمبوڵ پەنابەری و پەلەماری زاڕووەێل جەنگ، دە سووریە دناسرێ، رەسی وە ئنگلیس.
ئی ماڵبووکان فرەگەورا ک رووژ 27 ژووئیه له تورکیه که‌فتگەسەڕێ ئوو دۆماێ پەنج ساڵ رێ کردن ئێسە دش کردگەسە نام شار لەندەن، ئەڕا یەسە ک دنیا ویردار بکەێ وە زاڕووەێلێ ک ئێسە دە سووریە و ناوچەگە تووش شەڕ و تروریستەێلە هاتنە و لێز و ژیانێیان شێویاگە ئوو مەبەست لەێ کارە یەسە ک بەزەێ دنیاوەندەێلە وە زاڕووەێلێ ک دیرن دەێ نام‌دەسان دتەڵەفن، بجوولنن.
"جو لادا" هونەرپیشەێ نامدار ئنگلیسی لە کەسەێلێ بییە ک چگەسە پیری ئی ماڵبووکانە. هەڤدە ماڵبووکان‌گەردن، دە ئی رێگەوە "ئەمەڵ" دچەرخنن.
وشەێ "ئەمەل" دە عەراوی یانێ "ئارزوو" ئوو ئەڕا یە نریاگەسە مل ئی ماڵبووکانە تا گشتێ بزانن ک وە بان ئی هەمگەێ گیچەڵەوە، "زاڕووەێل جەنگ" هێمان هیوا و تاسەێل فرەیێگ دیرن ئەڕا ژیانێگ تر و ئارزووەێل خوەیان لە دەس نەدانە.
