مەی ساختە ٥٤ کەس لە هندستان کوشێد
2024-06-23T10:43:27+00:00
شەفەق نیوز/ ٥٤ کەس لە هندستان گیانیان لەدەسدان و زیاتر لە ١٠٠ کەسیش کەفتنەسە خەسەخانە، لەوەر نووشین مەی ساختە لە ویلایەت تامیل نادو باشوور وڵات.
لە رووژ چوارشەممەو نزیکەی ٢٠٠ کەس رەسیەسە خەسەخانە، دویای ئەوەگ تویش هەڵاوردن و زگژان و زگچین هاتن، لە پشت نووشین مەی، کە میسانۆل لەناوی بویە، لە ناوچەی کالاکوریچی.
وەرپرسیگ لە ناوچەگە وت: وەرپرسەیل ٧ کەس دەسگیر کردنە، و ریکارەیل وەشوینکەفتن دروسکەر و بفرووشەیل مەی لە ناوچەگە وەڕیەو چوود.
حکومەت ویلاەتەگە وت: مینەی ئەو کەسەیلە کەن کە میسانۆل دروس کەن کە مادەیگ کیمیاییە ئەرا کارەیل پیشەسازی وەکار تیەێد.
