مەرز مهران بڕ هەناردەیل ئیران ئەرا عراق وەماوەی چوار مانگ راگەینێد

شەفەق نیوز/ روحەلڵا غولامی وەڕیەوبەر گشتی گومرگ پارێزگای ئیلام، ئمڕوو چوارشەممە، هەناردەکردن یەک مەلیۆن و ١٠٥ تەن لە کاڵا وشمەک لەڕی مەرز مهران سنووری ئەرا عراق وەماوەی چوار مانگ گوزەشتە راگەیان.

ئاژانس "مهر" نیمچە فەرمی ئیران لە زوان غولامی وت: خەرج ئەو هەناردەیلە رەسیە ٤٩٣ مەلیۆن دۆلار، ودیاری کرد ک ٢٠ لەسەد کاڵا وشمەک ئیرانی ئەرا عراق وە مەرز مهران رەد بوود، وەگەرد ٦٥ هەزار تەنیش ترانزێت.

وتیش: هەناردەیل لەبان مەرز مهران وەرەو عراق رەسیە ٦٩ لەسەد وەماوەی یەکەم چوار مانگ لە ساڵ ئیرانی ئیسە.

وەگورەی ئەو وەرپرس گومرگیە، مەرز مهران ها پلەی یەکەم لەناو ١٢ مەرز سنووری ئیرانی لە هەناردەکردن ئەرا عراق، و لە خود وەختەگە مەزەنە کرد بڕ هەناردەیل ئەرا عراق وەگەرد کۆتایی ئمساڵ بڕەسێدە زیاتر لە ٣ مەلیۆن تەن.