مەردم فرەیگ چنە ناو رەشید و رەسنە نزیک بانک ناوەندی عراق.. وینە

مەردم فرەیگ چنە ناو رەشید و رەسنە نزیک بانک ناوەندی عراق.. وینە
2023-01-25T11:13:33+00:00
شەفەق نیوز/ ئەو خوەینشاندانە ک شەوەکی ئمڕوو چوارشەممە، دەسوەپی کرد، لە وەردەم بانک ناوەندی عراق لەناوڕاس بەغداد پایتەخت وەردەوامە، وە داوای ئارامگردن نرخ دۆلار و رزگارکردن دینار عراقی.

وینەیل کامیرای ئاژانس شەفەق نیوز سەدان کەس لە خوەینشاندەرەیل نشان دان، ک بوینەسە شەپوولیگ لە مەردم، و هیزەیل ئەمنی لە هیزەیل مقیەتیکردن رژیم نوایان گردنە.

خوەینشاندانەگە، شەوەکی وە بەشداریکردن سەدان لە خەڵک بەغداد، و کەسەیلیگ لە پارێزگایل جیاجیای وڵاتەگە، هەرلە مەیدان رەسافی دەسوەپی کرد، تا رەسیە ناوڕاس جادەی رەشید، وەرانەوەر سوق عەرەبی، ک لەورا بینای بانک ناوەندی عراقیە، وەگەرد کۆمەڵگەی بانکەیل حکومەتی عراق.

خوەینشاندەرەیل ک شمارەیان رەسێدە نزیکەی 800 کەس، نزیکەی 100 مەتر لە بانک ناوەندی عراق نزیکەو بوین، و هیزەیل ئەمنی وە خەسی هانە دەورگرد بانکەگە.

خوەینشاندەرەیل داوای کۆتاییهاوردن وە بان و خوارکردن نرخ دۆلار کردن، و جیوەجیکردن ریکارەیل ئابووری زوینە ئەرا گلەوداین نرخ دۆلار وەپای نرخ فەرمی و سزادان گەندەڵەیل.

هەمیش داوا لە محمد شیاع سودانی سەرۆک وەزیرەیل کردن دەرچوودە نوای گەلەگە، و ریکارەیل راسییگ راگەینێد تا قەیرانەگە سووکەو بکەێد و نرخەیل ئارام بوون.

Shafaq Live
Shafaq Live