لەناوڕاس قەیرانەگە.. وەرپرس پەڕشەلۆنە باس دەرچگن میسی کەێد
شەفەق نیوز/ قەیران نوویگ دەێد لە پەرشەلۆنەی ئیسپانی وەهووی باسکردن لە ئەگەر دەرچگن هەسارەی تیمەگە لیونێل میسی. وەرپرس یانەگە جۆسیپ ماریا بارتۆمیۆ وە زاراوەیگ قسەکرد ک دڵنیای جەماوەرەگە کەێد، دووپاتکرد ک بازیگەرە ئەرجەنتینیەگە دەرنێەچوود.
گریەبەس میسی وەگەرد پەرشەلۆنە لە کۆتایی وەرز ئایندە تەواو بوود، بەڵکم ئەوە مسۆگەر مەنینی نێەکەێد لە تیمە کاتالۆنیەگە، وەگەرد هەسی تەوەریگ مووڵەت وە دەرچگنی دەێد لە کۆتایی هەر وەرزیگ.
بڕیگ راپۆرت باس لە دڵگرانی میسی کردن لە بریارەیل بارتۆمیۆ ، وەتایبەت دویای داناین کیکی سیتین جوور وەڕیەوبەریگ پیشەیی ئەرا تیمەگە، و نزیکبوین پەرشەلۆنە ئەرا وەدەسداین نازناو دەوریە ناوخۆیەگە ئەرا بەرژەوەنی رکابەرەگەی ریال مەدرید.
بەڵکم وەرپرس یانەگە لە قسەگانی ئەرا کەناڵ تی ڤی ٣ تەلەفزیۆنی کاتالۆنی دووپاتکرد ک دانوستان نووەوکردن گریەبەس میسی وە شیوەی خاسیگ وەڕیەو چوود، و دڵنیایی خوەی دیارخست ک کاپتن تیمەگە و هەسارە یەکەمەگەی وەی نزیکە واژوو مه‌نن کەێد.
بارتۆمیۆ وت: قسە کردیمن و قسەیش کەیمن و وەرداومیمن لە دانوستان وەگەرد میسی، خوەی خوازێد کۆتایی وە كارنامه‌گەی لەیرا بارێد، وە دڵنیاییەو ئەوەسا وەگەردی نووەو کەیمن، من گومان نەیرم ک خوەی لەیرا مینێد.
وتیش: خوەی خاسترین بازیگەرە لە مێژوو تۆپان، چەنه‌ها ساڵ لە بازیکردن ها لەنوای، بی گومان ئەوەسا وەل پەرشەلۆنە مینێد، دویارووژی ها ئیرا لە تۆپان و دویای تۆپانیش.
