لوبنان رووژ خویناویی وە زیاتر لە ٢٠٠٠ کوشیان و زەخمداری وە گورزەیل ئیسرائیل تەواو کەێد

شەفەق نیوز/ ئامار گورزەیل ئیسرائیل لەبان باشوور و خوەرهەڵات لوبنان، لە شەوەکی دویەکە دووشەممەو، رەسیە ٤٩٢ کوشیان و زیاتر لە ١٦٤٥ زەخمدار لە ئاماریگ بیوینە لە وەختیگەو جەنگ حزبوڵا و ئیسرائیل دەسوەپی کردگە، کە یە نزیکەی ساڵیگە وەردەوامە.

 وەزارەت تەندروسی لوبنان راگەیان کە ٣٥ مناڵ و ٥٨ ژن هانە ناو کوشیاگەیل.

دانیال هەگاری قسەکەر سوپای ئیسرائیل ئەرا رووژنامەنویسەیل وت: شمارەی گەورەیگ لە حزبولڵا کوشیان کە لەلای ئەو چەکەیلە بوین کە کریانە ئامانج.

ئیسرائیل دویەکە دووشەممە، گورزەیل ئاسمانی خەسیگ و بیوینە ئەنجام دا، کە لە بەیاننامەیگ وت: چەک ئاسمانی پەلامار نزیکەی ١٣٠٠ شوین حزبولڵا لە لوبنان دا.

ئی کارە هیشت حزبوڵا وە بڕیگ مووشەک وەڵام بەێۆ، بەشیکیان رەسیە ناوڕاس حەیفا.