لە لێدوانیگ شۆککەر.. سەرۆککۆمار ئیران: تاران وە قەیرانیگ رەد بوود کە ری ژیان لەناوی نییە
شەفەق نیوز/ مەسعوود پزیشکیان، سەرۆککۆمار ئیران، بویین ئەو گرفتەیلە ئاشکرا کرد کە وە گەورە باسی کرد لە ئیدارەی تاران پایتەخت، هوشداری دا لە "کەمییگ رخبەر" ئاو، کارەبا، گاز و وزە وە درویژایی ساڵ.
سەرۆک کۆمار ئیران لە گردەوبوین ئەنجومەن پلاندانان و گەشەپیدان پارێزگای تاران راگەیان کە واران (لە وەرز زمسان) کەم بویە، یەیش ئەگەر ئەوە زیاتر کەێد کە وڵات لە ساڵ ٢٠٢٦ بکەفێدە "ناهاوسەنگی تون" لە بوار ئاو، وە تایبەت کە تاران وەشیوەیگ سەرەکی پشت وە ئاو واران و ئەمبارکردن وەفر و ئاو ژیر زەوی بەسێد.
وتیش: رەوش ئیسەی تاران دی ری وە ژیان لەناوی نیەێد، پایتەختیش نیەتوەنێد لە ری تانکەرەو ئاو دابین بکەێد.
وەرجەیە، وەرپرسەیل ئیران باس کەمەوبوین ریژەی وارانوارین وە زیاتر لە 40% وەرانەور ئاست دروژخایەن کردن، بیجگە لە کەمەوبوین لە سەرچاوەیل ئاو ژیر زەوی، کە بویەسە مدوو قەیران داوەزیان زەوی، و وەگەرد هشکەساڵی و کەمی ئاو.
لەی باوەتە پزیشکیان راگەیان کە بەشیگ لە ناوچەیل، جویر ڤارامین، نزمەوەوین زەوی وەگورەی ٣٦ سانتیمەتر لەناوی بویە، لە وەختیگ دانیشتنیگ زویوەزوی وەڕیەو چگ هەناێ ٣ سانتیمەتر لە ناوچەیل ترەک چگنە خوارەو، یەیش سەختی رەوشەگە چەسپنێد وەگەرد نزیکەوبوین کێشەگە لە ناوەند پایتەخت، لەلای خوەییش محمد ئاغامیری، سەرۆک دەسەی بیناسازی لە ئەنجومەی شارەوانی تاران، هوشداریدا لە رخدارییگ گەورە نزمەزبوین ٨ ناوچەی پایتەخت، وتیش: وەرجەیە بڕیگ رویداو لەو ناوچەیلە بویە.
لە ڕاپۆرتەیل وەرین باس لەوە کریا کە قەیران داوەزیان زەوی کاریگەری لەبان ژیرخانی گرنگ جویر فڕۆکەخانەیل دیرێد، نزیکەی ١٤ ملیۆن کەس (٢٠٪ی دانیشتگەیل) وە لاوازی مەزەن کریەێد.
رووژنامەی ئیتەماد هوشداری دا کە ساڵ ٢٠٢٦ ساڵیگ جیاوازە لە قەیران ئاو و وزە.
پزیشکیان دووپاتیش کرد کە ئەو گیچەڵە تەنیا بە دەرکردن ڕێنمایی یا تەمە چارەسەر نیەوود، بەڵکم یە دەسوەردان پسپۆڕەیل خوازێد، وەگەرد هوشدارییگ کە نەویین وریایی هاتێ بوودە مدوو بڕین غاز لە ماڵەیل لە وەرزی زمسان.
