لە عراق تا ئیران.. خوەڵوتوز مەکتەوەیل بەسێد و پەک کارەیل خەێد
شەفەق نیوز/ میدیایل راگەیانن فەرمی ئیران، ئمڕوو سێشەممە، خەوەردان ک مەکتەو و نویسینگەیل حکومەتی لە تەهران پایتەخت وشارەیلیگ تر دویای گەردەلۊل خوەڵوتوزیگ نوو دەرەیلیان بەسان.
تەلەڤزیۆن ئیرانی وت: واگە فرە بەد بویە، وئاست پیسبوین لەوەر خوەڵوتوزەگە بەرزەو بوی. یە سێیەم گەردەلۊل خوەڵوتوزە ک لە ناوڕاس نیسان گوزەشتە تا ئیسە ئیران وەخوەی بوینێد، ک دەسەڵاتەیل لە تەهران و پارێزگایلیگ تر لە هەفتەی گوزەشتە لەوەر خوەڵوتوزیگ هاوشیوە بەسان، باوجی ئمڕوو یە یەکەم جارە کار نویسینگەیل حکومەتی لە تەهران لەوەر خوەڵوتوز بوەسێد.
ئیران وە یەکیگ لە پیسترین شارەیل جەهان دریەێدە قەڵەم.
ناوچەیل خوەرئاوای وڵاتەگە وەگەرد سنوور عراق، دووارەی بەسیان مەکتەو و کۆمپانیایل لەوەر خوەڵوتوزەگە وەخوەیان دین.
هەمیش دەیان کاروانەیل ئاسمانی لە فڕۆکەخانەیل خوەرئاوای ئیران رووژ دووشەممە دویاخریان.
لە عراق هاوسای، خوەڵوتوزەگە – هەشت گەردەلۊل خوەڵوتوز لەلای کەمەو هەر لە نیسان تا ئیسە – بویە هووکار پڕبوین خەسەخانەیل وە هەزاران لە خەڵکەگە لەوەر گرفتەیل سەختیگ لە هەناس، و یەک کەس لەلای کەمەو گیانی لەدەسدا.
لە سوریا، سێ کەس لەلای کەمەو لە سنوورەگە وەگەرد عراق، لەوەر خوەڵوتوزەگە گیانیان لەدەسدان.
