لە رویداویگ فەرمی.. گلیان نانسی بیلوسی کوڵکی شکنێد
شەفەق نیوز/ خانمە سەرۆک وەرین ئەنجومەن نوێنەرەیل ئەمریکا، تویش زەخمداری هات لەناو رویداویگ فەرمی، دویای گلیانی لەبان پاچینە و کوڵکی شکیا.
بیلوسی مەوقەی چگنی ئەرا لۆکسمبۆرگ ئەرا یادکردن بەشیگ لە جەنگ جەهانی دویەم، تویش ئەو گلیانە هات و ئەرا خەسەخانە بریا، وەگورەی راگەیانن نویسینگەی خوەی.
ئیان کراگەر قسەکەر وەناو بیلوسی لە بەیاننامەیگ کە فرانس پرێس بڵاوی کرد وت: بیلوسی (٨٤ ساڵە) لە دۆکیەی گەورە بوی وەگەرد شاندیگ پەرلەمانی ئەرا ئاهەنگ ساڵیاد هەشتای جەنگ ئەردین.
وتیش: ئەو نوێنەر دیموکراتیە لە کالیفۆڕنیا لەناو رویداویگ فەرمی تویش زەخمداری هات، و ئەرا خەسەخانە بریا.
وەگورەی شمارەیگ لە میدیایل ئەمریکی، ئەو خانمە سیاسەتمەدار کاریگەرە لەبان پاچینە گایا و کوڵکی شکیا.
کراگەر وتیش: ئیسە چارەسەری خاسیگ وەرگرێد، و لە کاری وەردەوامە، و خەفەت خوەێد چوینکە نەتوەنست لە کاروبارەیل شاندەگە ئامادە بوود.
پارەکە بیلوسی پۆستەگەی لەدەسدا، و خوەی یەکەمین ژنە بوودە سەرۆک پەرلەمان.
وەلێ کاریگەری گەورەیگ دیرێد لەناو پارت دیموکرات و مەزەنە کریەێد کە خوەی دەسیگ لەناو ئەوە داشتیە کە جۆ بایدن لە کاندیدکردن سەرۆکایەتی واز بارێد.
