لە دویای 10 پەلامارداین چەکداری بانکەیل لوبنان دەرەیلیان بەسان
شەفەق نیوز/ 10 بانک لە لوبنان ئمڕوو جومعە، کەفتنە وەر کردەوەی دەسدرویژی چەکداری وەلایەن وەبەرهێنەرەیل، وە مەبەست وەدەسهاوردن پویلەیل بەسیاگیان، وەپای راپۆرتەیل ناوخوەیی، بڕیار دریاگە وە بەسانن بنکەی بانکەیل ئەرا ماوەی سێ رووژ، لە دویای ئی کردەوەیە.
لە رووژ جومعەی گوزەشتە، چەکداریگ دەسگیرکریا ک هەڵکوتاوێدە ناو بانکیگ لە شار غازیە باشوور لوبنان، تەقەلای وەرگردن پویلەیل پاشەکەوتکریاگی دایە ک لەوەر قەیران دارایی وڵاتەگە گردیەسەو، وەگورەی سکای نیوز.
سەرچەوەگە باسکرد، "وەرجە ئەوەگ دەسگیر بکریەیێد سەرکەفتی بویە لە وەرگردن بەشیگ لە پویلەگەی لە بانک بیبلوس لە غازیە".
ئیە لە دویای ئەو کردەوەی تێد ک سەرنج گشت جەهان وەرەو خوەی کیشا لە چوارشەممەی گوزەشتە، ک ژنیگ لوبنانی وە ناو سالی، ئەو بڕە پویلە ئەرا چارەسەر بیماری شێرپەنجەی خوەشکەگەی تواستوید.
سالی و خوەشکەگەی هەڵکوتابینە بان لق بانک بلۆم لە ناوچەی سودیکو نزیک لە بنکەی بالیۆزخانەی فەرەنسا لە بەیرووت، وە زوور چەک داوای پویل کردوین.
و لق مێد بانک" بانک دەریای ناوراس"، لە ناوچەی عالیە شوفیەت، تەقەڵایگ پەلامارداین وە خوەی دی ک دویەم جویر بوی لەهەمان رووژ لە لوبنان.
لەی ماوەی کۆتاییە رویداوەیل هەلکوتانە بان بانکەیل لوبنانی وەلایەن وەبەرهێنەرەیل ئەرا وەرگردن پویلەیل بەسیاگیان چەنجاریگ دوارەو بوی، کاردانەوەی مەترسیداریگ لەبان بارودۆخ ئەمنی وڵاتەگە دروسکردیە، ک وە دەس بارودۆخ ئابووری سەختیگ ناڵێد.
