كوشیان دوو فڕۆکەوان ئوردنی وە کەفتن فڕۆکەیان

شەفەق نیوز/ قسەکەریگ سەربازی ئوردنی، ئمڕوو یەکشەممە، باس کەفتن یەکیگ لە فڕۆەکیل راهێنان سەروە چەک ئاسمانی شاهی کرد، ک بویە هووکار کوشیان دوو فڕۆکەوان سەربازی.   

قسەکەرە سەربازیەگە لە فەرماندەی گشتی هیزە چەکدارەیل ئوردن وت: لە ساعەت نۆی شەوەکی ئمڕوو یەکشەممە، یەکیگ لە فڕۆکەیل راهێنان سەروە چەک ئاسمانی شاهی ئوردن لە مارکەی  (GROB) کەفتە وەر گیچەڵیگ هونەری لەمەوقەی گەردین راهێنان، ک کەفتە بان زەوی چووڵیگ لە ناوچەی رەمسا لە پارێزگای ئەربد، وەگورەی ئاژانس فەرمی "بەترا". 

هەمیش باس کوشیان هەرلە رائد فڕۆکەوان بیلال مەشهور ئەحمەد شوفیین، ونەقیب فڕۆکەوان بەها محمد موستەفا ئەوبو غنێمی کرد.