قیزەوەنترین تاوانەیل.. لەناو کتاویگ لەباوەت جینۆساید ئێزدیەیل لە پیشناگایگ ناودەوڵەتی
کتاوەگە ناونشان "باوەت ئێزدی نیشتمانی لەناوبەین داد نیشتمانی و داد ناودەوڵەتی" هەڵگردیە، ک وە قەڵەم دکتۆر رەواد سەلیقە، و خانمە مامووستا مەها مستەفا حاج نویسیاگە، و ئمڕوو لە پیشانکای کتاو ناودەوڵەتی بەیروت لە پایتەخت لوبنان نمایش کریا.
دکتۆر سەلیقە ک ئەفسەرە لە ئاسایش گشتی لوبنان، و خاوەن بڕوانامەی دکتۆرای یاسای ناودەوڵەتیە، ئەرا ئاژانس شەفەق نیوز وت: کتاوەگە رووشنایی خەێدە بان قیزەوەنترین تاوانەیل ناودەوڵەتی ک ویژدان مرۆیی و جەهانی هاوردە لەرزە ک لە سەدەی ٢١ دژوە کەمینەیگ ئاینی بیوەی لە باکوور عراق جیوەجی کریا.
لەباوەت لایەن یاسایی لە کتاوەگە، سەلیقە دیاری کرد ک رزبەنی تاوانەیل بان ئی کەمینە جویر تاوان جینۆساید و تاوان دژوە مرۆیی، و تاوان جەنگ توومار کریا، ک گەورەترین و فرەترین ریخریاگەیل لە روی تیرۆری لە ساڵ ٢٠١٤ مەوقەی دروستکردن دەوڵەت سلامی لە عراق و شام جیوەجیی کرد.
وتیش: باوەت ئی تاوانەیلە و ئەوەگ لەبانی کەڵەکە بوی هەرچەن یە نۆ ساڵە لەبانی رەد بویە، هیمان گرنگی گەورەیگ لەلای پەرلەمانەیل ئەوروپا دیرێد، لەوەر ئەو قیزەوەنیە و دڵتەزنی ئەنجامەیلی.
جی باسە ک پیشەکی کتاوەگە خانمە چالاکوان ئێزدی فەریدە عەباس خەڵەف نویساسەی، ک خوەی یەکیگ لە ژنەیلە بویە ک توەنستیە لە زیندانەیل داعش بواێد، و بڕەسێدە ئەڵمانیا و ریخریاگ «فریدا گلوبال» دروس کرد ک کار لە بڵاوکردن باوەت ئێزدیەیل لە گشت ناوچەیل جەهان کەێد، و لەناو کتاویگی وە ناونشان « ئەو دویەتە ک شکست وە داعش هاورد» خاس نشان دەێد ، ک باس زیانی وەرد تیرۆرستەیل کەێد.
تا وەشیوەیگ ئاشکراتر نشان تاوانەیل بەێد، وینەی چەرم کتاوەگە وە کار دەس شیوەکار ئێزدی هشام حاج کریاگە.
وەگەرد ئەوەیش، کتاوەگە دیداریگ تایبەت وەرد ئەو ژنە ئێزدی قورتاربویە هاناوی، ک باس یەکەم چرکەیل پەلامار داعش کەێد، و ئەو زیانە ک وەگەرد ئەو ژنەیل ئێزدیە کەێد ک قورتار بوینە.
کتاوەگە هەمیش رووشنایی خەێدە بان رۆل دادوەری عراق و ئەو دادکردنەیلە لەبان تاوانکارەیل، و توانای جیوەجیکردن داد ناودەوڵەتی ئەرا قوربانیەیل ئی تاوانەیلە.
