کەفتن زەخمداری لە ئەنجام تەقەکردن لەبان سنوور ناوەین ئەفغانستان و پاکستان
شەفەق نیوز/ تەقەکردن کەفتە ناوەین هیزەیل ئەفغانی و پاکستانی لە مەرز تورخم، بویە هوکار کەفتن زەخمداری و زەرد وە ماڵەیلیگ رەسیە، و ئی تەقەکردنە دویای شکست دانوسەنین دوو وڵات تیەێد لەبان دووارە وازکردن ئەو مەرزە کە یە دە رووژە بەسیاس.
کەناڵ "ئەلمەشرق" پاکستانی وت: بویەسە جەنگ گەورەیگ ناوەین هیزەیل پاکستان و ئەفغانستان لە مەرز تورخم، کە بویە هوکار کەفتن زەخمداری لەلای هەردوگ لایەن.
کەناڵەگە دیاری کرد کە 3 لە سەربازەیل پاسەوان سنوور پاکستانی و یەکیگ لە خەڵکەگە زەخمدار بوین، و زەرەد وە ماڵەیل رەسیە لە ئەنجام گولەی هەردوگ لایەن و هاوەن هیزەیل ئەفغانی.
وەگورەی لایەن پاکستانی، ئەو جەنگە لەوەر تەقەلایل هیزەیل ئەفغانی ئەرا بیناکردن خاڵ وەشکین لەناو ناوچەیگ کە ململانێ لەبانی هەس نزیک مەرز تورخم، کە سوپای پاکستان رازی وەوە نەویە و بویەسە وەردەوەردە.
شفقەت عەلی خان قسەکەر دەیشت پاکستان لە جمعەی گوزەشتە وت: لەباوت سنوور تورخم، گیچەڵە سەرەکیەگە ئەوەیە کە لایەن ئەفغانی خوازێد خاڵیگ سنووری لەلای ئیمەو بینا بکەێد، و داوا لەلییان کردیمنە ئی کارەیلە وە میکانیزم هەردوگ لایەن چارەسەر کریەێد.
دویەشەو دویای چەن ساعەتیگ لە شکست دانوسەنین ناوەین وەرپرسەیل ئەمنی پاکستانی و ئەفغانی ئەرا رەسین وە چارەیگ لە وازکردن مەرزەگە ئی وەردەوەردە دەسوەپی کرد.
مەرز تورخم یەکیگ لە دیارترین مەرزەیل هاوبەش ناوەین پاکستان و ئەفغانستانە کە کەفێدە بان سنوور هاوبەش لە هەرێم خەیبەر بەختونخوای پاکستانی و هەرێم ننگرهار ئەفغانی، کە بەسیانی زەرەد گەورەیگ وە بازرگانەیل رەسان، و کاریگەری لەبان هامشوو مەردم داشت.
وەگورەی کەناڵ "تڵوع نيوز" ئەفغانی، ژوور بازرگانی و بەرهەمهاوردن لە هەرێم ننگار خوەرهەڵات ئەفغانستان وت: بەسیان وەردەوام مەرزەگە زەرەد رووژانەی رەسێدە نزیکەی 500 هەزار دۆلار، و ژوور بازرگانی پاکستان باس دووارە وازکردن مەرزەگە کرد.
