فەرەنسا دەسکەێدە بایکۆت کار لەناو بەرزەوبوین ئاست پەنام
![فەرەنسا دەسکەێدە بایکۆت کار لەناو بەرزەوبوین ئاست پەنام](https://media.shafaq.com/media/arcella/1666079546167.jpeg)
شەفەق نیوز/ سەندیکایل کریکاری فەرەنسا، ئمڕوو سێشەممە، دەسکردنە بایکۆتیگ لە ئاست وڵاتەگە، وەداوای خەرجکردن مووچەیل، لەناو پەنامیگ دارایی ک یە دەیان ساڵە وەردەوامە، ک هیلێد سەرۆک ئیمانۆیل ماکرۆن بکەفێدە وەر یەکیگ لە سەختترین رووژەیلی، لە وەختیگ ک لە ئایار گوزەشتەو دووارە هەڵوژیایە.
بایکۆتەگە ک وەشیوەیگ سەرەکی کاریگەری خەێدە بان کەرتەیل گشتی، جویر مەکتەوەیل و رەسانن، درویژەداینە وەو بایکۆت پیشەسازیە ک تا چەن هەفتەیگ وەردەوام بوی، و پاڵاوەیل نەفتی سەرەکی لە فرەنسا پەک خست، و رەسین بەرهەمەیل ئەرا ویستگەیل سوتەمەنی وسان.
وەرپەسەیل سەندیکای کریکاری ئومید دیرن بڕیار حکومەت گورجەو بکەێد تا ناچار بەشیگیان ئەرا گلەوخواردن ئەرا کاریان لە بەنزینخانەیل بکەێد، وە تەقەلایگ ئەرا گلەوداین تەکان سوتەمەنی، ک ئویشن ئی گامە ماف بایکۆتەگە خەێدە وەر مەترسی.
وەگەرد بەرزەوبوین ژاوەژاو لە دویەم گەورەترین ئابووری لەناوچەی یۆڕۆ، بایکۆت رەسیە بەشەیلیگتر جویر کەرت وزە، ک رەسیە گەپ وزەی ئەتۆمی EDF (EDF.PA) ، ک ئەوەسا کار خاسەوکردن گرنگ ئەرا وزە لە ئەوروپا دیر کەفێد.
نوینەر سەندیکای FNME-CGT ، رووژ دووشەممە، وت: بایکۆت کاریگەری لەبان کار لە ١٠ ویستگەی ئەتۆمی فەرەنسی دیرێد، وەگەرد دیرکەفتنیگ زیاتر لە خاسەوکردن ١٣ ویستگە، و داوەزین بەرهەم وزەی فەرەنسا وە بڕ ٢،٢ گیگاوات.
بڕیارە لە ساعەت ١٢:٠٠ وە وەخت گرینیچ، خوەینشاندانیگ لە گشت وڵاتەگە وەگەرد یەک خوەینشاندان لە پاریس ڕێک بخریەێد.