شمارەی دانیشتگەیل لە ٣٢ وڵات جەهان وەرەو داوەزیان چوود
داوەزیان شمارەی دانیشتگەیل شایەت لەوەر یەکیگ یا تیکەڵیگ لە چەن هوکاریگ بوود، لەوانە پیربوین، مردن، ریژەی لەداڵگبوین ویا ریژەی زایین لە خوار جیگرەوەی دانیشتگەیل، ریژەی بەرز مردن کوورپە، و ریژەی بەرز مردن لەوەر جەنگ، تونوتیژی، بیماری یا کارەساتەیل.
هاتێ داوەزیان شمارەی دانیشتگەیل کاریگەری خاس و گەن لەبان میللەت داشتوود، ک لە لاییگەو شمارەی دانیشتگەیل بویچگەو کەێد، بەش تاکە کەسیگ لە سەرچەوەی سامان زیای بوود، بیجگە لەوەیش کەمبوبوین شمارەی دانیشتگەیل ئەو گرفتەیلە کەمەو کەێد ک پەیوەندی وە زیادبوین شمارەی دانیشتگەیل لە ناوچە زیانلیکەفتگەیل دیرێد، جویر زیایبوین پیسبوین، هاتوچو، نرخ ماڵ، و خراوبوین ژینگە.
بەڵام کەمەوبوین شمارەی ئەندامەیل کۆمەڵگا هاتێ بوودە مدوو پیربوین دانیشتگەیل و بویچگبوین هاز کار - وەتایبەتی لەلای کریکارەیل خوەنەوار ئاست باڵا. ئی کەمیە توەنێد بوودە هوکار داوەزین گشتی کوالیتی ژیان، و ئەو بەرنامەیلە ک حکومەت پارە ئەرایان دیاری کەێد، و بەرهەم ناوخوەی گشتی نیشتمانی.
لە ناو ئەو ٣٢ وڵاتەی جەهانە ک داوەزین شمارەی دانیشتگەیل وەخوەیان دوینن، وڵاتیگ عەرەبی لە لیستەگە دەرکەفت (لوبنان)، ک وە شیوەیگ سەرەکی لەوەر کووچبەری بویە، هەرلیوا جویر فرەی لە وڵاتەیل ئەوروپا، ک کووچبەردن فراوان دانیشتگەیل وەرەو دەیشت کشوەرەگە بیجگە لە داوەزین ریژەی لەداڵگبوین.
جەنگ هوکاریگ سەرەکیە ئەرا داوەزیان شمارەی دانیشتگەیل، وەتایبەتی لە رووسیا و ئۆکرانیا، لەوەر بەرزی ریژەی مردن مەوقەی زایین، هەرلیوا، ئاوارەبوین فرەیگ لە کەسەیل وەرەو شوینیگ بیوەی.
