سویەی ئەوروپا وە دویکەڵ تاسیەێد.. ئاڵشتبوین کەشوهەوا تاوسان سەختیگ چەسپنێد

شەفەق نیوز/ دەوڵەتەیلیگ ئەوروپا، جویر بەریتانیا و فەرەنسا و ئیتاڵیا و ئیسپانیا و پورتوگال، ئاگرەیل فرەیگ وەخوەیان دوینن، وەگەرد ئی وەرز تاوسانە، ئەوەیش لەو ئاڵشتبوین کەشوهەوای ئاشکرا ک کشوەرە پیرەگە کەفتیەسە ناوی، لە وەرز تاوسان سویەریگ لە بەش خوەرئاوا وباشوریی.        

ئامادەباشی لە بەریتانیا       

بەریتانیا ک بەرزترین پلەی گەرمی لە گشت میژووی توومار کرد، لە ٤٠ پلەی سیلیزی لە بەشیگ لەناوچەیلی رەد کرد، دویدیگ لەو ئاگرەیل فراوانی وەخوەی دی.     

  بەریتانیا "ئامادەباشی نیشتمانی" راگەیان، لەوەر بەرزەوبوین گەرمییگ ک وەرجەیە نەویە.        

گرانت شابس وەزیر گواستنەوە وت: کارەگە چەن ساڵیگ کیشێد تا بەریتانیا بتوەنێد بینایل ژیرینی نووە بکەێد ئەرا رەفتاکردن وەرد پلەی گەرمی بەرز، دویای ئەوەگ نشانەیل زەرەد لەبان دوو پاچینەی فڕۆکەخانە و لاری سکەی ئاسن بەشیگ لە قەتارەیل وەخوەی دی.      

دەیان ئاگر لە ناوچەیلیگ جیاجیا لە ئینگلتەرا و ویڵز لەوەر ئەو گەرمی پەیمانەییە دویەکە سێشەممە هیز گردن، و راپۆرتەیلیگ باس ئەوە کەن ک شایەت ئمڕوو پلەی گەرمی کەمیگ داوەزێد.       

لە گشت شوینیگ      

فەرنسا، تیمەیل ئاگرکپکردن تەقەلا دەن ئاگر دارسانەیل فرەیگ لە باشوور و خوەرئاوای وڵاتەگە کپەو بکەن، لەناو راپۆرتەیلیگ باس ئەگەر توومارکردن پلەی گەرمی پەیمانەیی لە باشوور و خوەرئاوای ئەڵمانیا وبەلجیکایش کەن.        

ناوچەی جیرۆند لە باشوور خوەرئاوای فەرەنسا ک باخەیل ئەنویر لەناوی هەس، گەورەترین ئاگر دارسانەیل وەخوەی دی، و دەسەڵاتەیل وتن: پیاویگ دەسگیر کریا ک گومان لە ئاگردانی لەلی کریاگە.          

لە ئیسپانیا، گەرمیەگە ک تا زیاتر لە هەفتەیگ وەردەوام بوی، بویە هووکار زیاتر لە ٥١٠ مردن، وەگەرد مەزەنەیل پەیمانگای کارلۆس و سێیەم.       

و زیاتر لە ١٧٣ هەزار فەدان لە ئیسپانیا لەی ساڵە سزیا، ک یە بەدترین ساڵە.       

لە پورتوگال، پلەی گەرمی وەگەرد ئی هەفتە داوەزیا، باوجی رەوانگەی کەشوهەوای پورتوگال ئویشێد: رخ لە سزیان دارسانەیل هیمان فرە بەرزە.      

لە ئیتالیایش، هەمیش وەوجویرە، ک ئاگرەیلیگ بویچگتر لەی رووژەیل دویایینە وەخوەی دی، و مەزەنە کریەێد گەرمی لە چەن ناوچەیگ بڕەسێدە ٤٠ پلەی سیلیزی.       

هەرلیوا، سویسرا زیان لەی شەپوول گەرمیە وەخوەی دوینێد، ک کۆمپانیای ئەکسپۆ ک سەرپەرشتیاری ویستگەی بیزناو ئەتۆمی کەێد، وت: ناچار بویە بەرهەمەگە کەمەو بکەێد، تا گەرمی چەم ئار زیایەو نەوود.