ئیسرائیل هەڕەشەی جویلەی سەربازی لەبان ئیران دەێد
2023-05-23T13:34:57+00:00
شەفەق نیوز/ هێرزی هێلڤی، سەرۆک ئەرکان سوپای ئیسرائیل، ئمڕوو سێشەممە، وت: پیشهات بەدیگ لەباوەت چەک ئەتۆمی ئیران هەس، ک هاتێ بوودە مدوو کردەوەیگ سەربازی.
وەرپرس سەربازی ئیسرائیل لە کۆنگرەی هەرزلیا، وتیش: "ئیران لە گشت وەختیگ زیاتر پیشکەفتن لە دروسکردن یۆرانیۆم وەدەس هاوردگە، ئیمە وەپی نووڕیمن و ئویشم پیشهات بەدیگ لە ئاسوو دیارە ک هاتێ بوودە مدوو کرداریگ".
وتیش: ئیمە توانای دەسوەشنانن لەبان ئیران دیریمن، ئیمە بیباک نییمن لە تەقەلای بەرزکردن یۆرانیۆم ئیران و چە لە دەورگردمان کەێد، سەختە تەهران بیباک بوود وەرانوەر کڕە ک وەپیا رەد بوود.
وەرجەیە، دویەکە دووشەممە، یۆئاڤ گالانت، وەزیر وەرگری ئیسرائیل هەڕەشە لە ئیران کرد ک ئەگەر بڕیار بیەێد ڕێژەی دروسکردن یۆرانیۆم ئەرا ٩٠٪ بەرز بکەێد، باج قورسیگ دەێد، یەیش نشانەیگە ئەرا ئەوە ک گشت ریەیل نواگیریکردن ئیران لە دەستکەفتن چەک ئەتۆمی هانە بان مێز.
