٨٤ کەس لە ئیمارات وە توومەت دروسکردن رێکخستن ژیروەژیر خریەنە دادگا
2024-01-06T13:14:16+00:00
شەفەق نیوز/ ئاژانس خەوەری ئیمارات "وام"، ئمڕوو شەممە، هەواڵەکردن ٨٤ توومەتبار لە ئیخوان موسلیمین ئەرا دادگا راگەیان، ئەوەیش وە توومەت دروسکردن رێکخستن ژیروەژیر ئەرا جیوەجیکردن کارەیل تونوتیژی و تیرۆری.
ئاژانسەگە لە خەوەریگ کە ئاژانس شەفەق نیوز لەلی ئاگادار بوی وت: راویژکار حەمەد سەیف شامسی توینەر گشتی دەوڵەت، فەرمان هەواڵەکردن ٨٤ توومەتبار ئەرا دادگا دا فرەیان ئەندامن لە ریخریاگ ئیخوان موسلیمین تیرۆرست ئەرا دادگای ئاسایش دەوڵەت لەبان تاوان دروسکردن رێکخستنیگ ژیروەژیر ئەرا جیوەجیکردن کارەیل تونوتیژی و تیرۆری لەبان زەویەیل دەوڵەتەگە.
دیاری کرد کە توومەتبارەیل تاوانەگە شاردنەو وەرجەیەگ دەسگیرکردن بکریەن و بریریەنە دادگا لە کەیس شمارە ١٧ ئەرا ساڵ ٢٠١٣.
