سەرۆک کۆریای باکوور پەیمان دەێد وە ئامادەکردن هیز ئەتۆمی ئەرا رویوەڕویبوین ئەمریکا

شەفەق نیوز/ کیم جۆنگ ئۆن سەرۆک کۆریای باکوور، پەیمان دا کە بیلێد هیز ئەتۆمیی وەتەواوی ئامادە بوود ئەرا جەنگ ئەمریکا و هاوپەیمانەیلی، وەگورەی قسەی میدیایل راگەیانن فەرمی، ئمڕوو سێشەممە.

ئەوەیش دویای ئاشکراکردن وڵاتەگە ئەرا پلاتفۆرم نوویگ کە ئەرا وەشانن مووشەک پالییستی کیشوەری دروس کریاس کە هازی فرەترە و بڕەسێدە هشکایی ئەمریکا.

کیم پەیمانەیایگ وەیجویرە راگەیان، وەلێ ئی پەیمان تووە لە وەختیگ تیەێد کە پسپۆڕەیل مەزەنە کەن کە کیم ئەوەسا تاقیکردن چۆکەی وەبان چەمەیل کەێد وەرجە هەڵوژاردن سەرۆکایەتی ئەمریکا لە نۆڤەمبەر.

لەی رووژەیل دویاییە، کۆریای باکوور دووارە دەسکردە مەرەقەزکردن بالۆن پڕ لە گەناڵخە وەرەو کۆریای باشوور.