زریان رخبەریگ ویلایەتیگ ئەمریکا گرێدەو و هوشداریی لافاو دریەێد
دەسەڵاتدارەیل ویلایەتەگە هووشداری و فەرمان چووڵکردن لە پارێزگایل سانتا باربارا، لۆس ئەنجلۆس، ڤێنتورا و مۆنتەری دەرکردن، و ئمڕزو دووشەممە، مەکتەوەیلیش دەرەیلیان بەسان لە گشت پارێزگای سانتا باربارا.
زریانەگە ناوی "ئەناناس ئێکسپرێس"ە، رووژ شەممە رەسیە باکوور کالیفۆرنیا، هەناێ بەش فرەی ویلایەتەگە کەفتە وەر وا ، یا کەفتە وەر لافاو.
خزمەتگوزاری کەشوهەوای نیشتمانی هووشدارییگ دەگمەن دەرکرد ئەرا وای تون زریانەگە کە لە کەنار ناوڕاس هەڵسێد، کە تونیەگەی رەسێدە 148 کیلۆمەتر لە ساعەتیگ لە نیمچە دوورگەی مۆنتەریەو تا بەش باکووری پارێزگای سان لویس ئۆبیسپۆ.
مەزەنە کریەێد زریانەگە وەدرویژایی کەناراوەیل بجویلێد و ناوچەی لۆس ئەنجلۆس بگرێدەو و واران فرەیگ و لافاو و وەفر لە بەرزاییەیل بوارێد، کە ئمڕوو دووشەممە ئۆرنج کاونتی و سان دیێگۆ گرێدەو.
مەزەنەیش هەس تا رووژ سێشەممە واران رفتیگ لە باشوور کالیفۆرنیا وەردەوام بوود.
دەزگای کەشناسی نیشتمانی مەزەنە کەێد وەگەرد وارانەگە لە ناوچە کەنار دەریا و دۆڵییەیل باشوور کالیفۆرنیا نزیکەی ١٥ سم بوود، و لە هاماری و کویەیلە تا ٣١ سم بەرزەو بوود، زانایل کەشناسی وتنە کە لەزەوی رمیەێد و لافاو دروس بوود.
