زانيارییگ فەرەنسی ناسنامەی ئەو سیخوڕە ئاشکرا کەێد کە شوین نەسرولڵا دادە دەسەو

شەفەق نیوز/ رووژنامەی “le parisien” فەرەنسی باس دویاترین ساعەتەیل ژیان حەسەن نەسرولڵا ئەمیندار گشتی حزبولڵا کرد وەرجە کوشتنی وە گورزیگ ئیسرائیلی، و ئاشکرا کرد کە دویای پرسەی محمد سروور فەرماندەی یەکەی فڕۆکەیل بیفرۆکەوان حزبەگە رەسیە دەورگرد بەیروت.

 رەوژنامەگە لە راپۆرتیگ وت: ئیسرائیل چەوەڕی گردوبوین نەسرولڵا وەگەرد سەرکردەیل حزبەگە کرد تا پەلامار ئەو شوینە بەێد کە ٣٠ متر هاژیر زەوی.

وتیش: گورزەگەی ئیسرائیل دویای ئەوە هات کە سیخوڕیگ ئیرانی ئاگادار ئیسرائیل کرد کە حەسەن نەسرولڵا رەسیە شوینەگە، وەگورەی  “le parisien”.

وتیش: بیجگە نەسرولڵا و جیگر فەرماندەی فەیلەق قودس ئیرانی، ١٢ سەرکردە لە حزبولڵا لەناو ئەو گردەوبوینە بوین.