زەویلەرزەیگ دا لە کاریبی و هوشداری لە تسۆنامی

شەفەق نیوز/ دەسەی روپێوی جیولۆجی ئەمریکا، ئمڕوو یەکشەممە، راگەیان زەویلەرزەیگ وە هاز 7.6 پلە دا لە ناوچەی دەریای کاریبی، هووشداری لە رویدان تسۆنامی دریەێد.  

دەسەگە راگەیان، زەویلەرزەگە لە دویری 200کم لە باشوور خوەرئاوای شار جۆرج تاون لە دورگەی کایمان بویە.

وتیش، زەویلەرزەگە لە قویلایی 10کم لە ساعەت  18.23 دویەشەو شەممە وەپای وەخت ناوخوەیان (5- ت.غ) رویدایە.

سیستەم هووشداریدان لە تسۆنامی سەر وە دەسەی نیشتیمانی کەشناسی، هووشداریدا لە دروسبوین شەپۆلیل گەپیگ لەناوچە کناراوەیل دورگەی کایمان و جامایکا و کوبا و مەکسیک و هندوراس و دورگەی ئەلباها و سان ئەندرێس و برۆفیدنیسیا و بلیز و هایتی و کوستاریکا و بنما و نیکاراغوا و گواتیمالا.