زەریف: وەرپرسایەتی کەفتن هەلیکۆپتەرەگەی رەئیسی خستە مل ئەمریکا و سەدام حسێن
میدیایل راگەیانن ئیرانی لە زوان زەریف وتن: ئەمریکا یەکیگە لە خاوەن کەموکوڵیەیل لە رویداوەگەی دویەکە، کە هەرچەن دادستان ناودەوڵەتی فەرمان داگە، ئەمریکا قەیەغەی فرووشتن پارچە کەسەرتەیل فڕۆکەوانی ئەرا ئیران کرد.
وتیش: وە درویژایی ٤٥ ساڵ گوزەشتە، گەل ئیران رووژەیل سەختیگ وەخوەی دی، و و هاوکاری و پشتیەکگردن ناکەی پشتسەر، کە پەلامار سەدام لەبان ئیران و جەنگ ناچاری ١٩٨٠ - ١٩٨٨ و سزا سەختەیل وەبان کۆمار ئیسلامی، گشت ئەوانە بەشیگ بەو رەوشەیل سەختە بوین کە کۆمار ئیسلامی وە سەرکەفتن نادەیان وەپشتسەر.
زەریف وتیش: یەکیگ لە هوکارەیل ئی کەلەمەی ژیانداران ئەمریکاس، کە قەغەی فرووشتن فڕۆکەیل ئەرا ئیران کرد، لە شەهیدبوین سەرۆک و یاوەرەیلی، و بیگومان تاوان ئەمریکا لە هویرمان گەل ئیران و میژوو ئیران توومار کریەێد.
توومەتکردن زەریف لەبان ئەوە هات کە ئەمریکا سزا لەبان ئیران چەسپنێد وە قەیەغەکردنی لە هاوردەی فڕۆکەیل، و پارچە کەسەرتەیل و خاسەوکردن فڕۆکەیل، لەناویان ئاو هەلیکۆپتەر ئەمریکیە کە رەئیسی لەناوی بوی.
