رووژنامه‌يگ بريتانى: ئه‌ردوغان خوه‌ێ وه سوڵتان زانێد
شه‌فه‌ق نيوز/ رووژنامه‌ێ ئه‌لتايمز بريتانى پيشه‌كيه‌گه‌ێ وه‌ناونيشان"سوڵتان ئه‌نقه‌ره: ئه‌ردوغان ساڵياد كوده‌تا ئه‌يه‌رێده كار ئه‌را ته‌نگه‌وكردن حاڵ دوشمنه‌يلى و پشتگيرى ده‌سڵاته‌گه‌ێ"بڵاو كرد.
رووژنامه‌گه ئويشێد: ئه‌ردوغان ساڵياد كوده‌تا وه‌كار هاوردگه ئه‌را ئه‌وه‌گ لايه‌نگره‌يلى وه‌پى له‌ده‌ور خوه‌ێ گرده‌و بكاو ئه‌فسانه‌يگ سياسى له‌بان شه‌هيده‌يل دروس بكا و ته‌بريه‌ێ ئه‌و ره‌شبگيره بكا ك ساڵ گوزه‌يشت ئه‌نجامێ داو هه‌ڕه‌شه وه‌پى له لايه‌نگره‌يل كوده‌تا بكا.
رووژنامه‌گه هه‌ميش وت: هويچ كه‌سيگيش گومان له ئازايه‌تى ئه‌وانه نه‌يرێد ك روێ وه‌ڕوێ ئه‌و كوده‌تا بوينه‌و ك هويچ حكومه‌تيگ خوه‌رئاوايى لايه‌نگريى ناكا، وه‌لێ نگه‌رانى خوه‌رئاواو مه‌ردمان فريه‌يگيش له توركيا ئه‌وه‌سه ك ئه‌ردوغان هه‌وڵ ئه‌و كوه‌تا ئه‌را هه‌ڵمه‌تيگ له‌بان ئۆپۆزسيۆنه‌يلى و نه‌ياره‌يل سياسيى هاورده‌سه كار.
