گەرمییگ پەیمانەیی کووچبەرەیلیگ لە ئەمریکا کوشێد
دەیان ملیۆن ئەمریکی کەفتنەسە وەر بەرزەوبوین پلەی گەرمی رخبەریگ، دویەکە جمعە، لەوەر شەپوولیگ گەرمای فرەیگ، کە لە کالیفۆرنیا وەرەو خوەرئاوا چوودە ناو بەشیگ لە فلۆریدا لە خوەرهەڵات، و وە ویلایەت تەکساس رەد بوود، لە وەختیگ مەزەنە کریەێد ئەو شەپوول گەرمیە لە کۆتایی ئی هەفتە بڕەسێدە لویتکەی.
وەگورەی ئاژانس فرانس پرێس، لە سەرەتای ئی هەفتەو شەپوولیگ گەرما لە ویلایەتە بیاوانییەیل باشوور خوەرئاوا زاڵ بویە، یەیش رخیگ تەندروسی لەبان کەسەیل گەورە تەمەن، کراکارەیل بیناسازی و رەسانن، و کەسەیل بی ماڵ و کەمدەس دروس کەێد.
لە ویلایەت ئەریزۆنا کە یەکیگە لەو ویلایەتەیلە ک فرەترین زیان وەپی رەسیە، ژیان رووژانە جویر دەودەوانیگ وەرانوەر تیشک خوەر بویە، جویر ئەوەگ دویەکە جمعە شار فۆنیکس پایتەخت ویلایەتەگە تووماری کرد، ئەرا پانزەهەمین رووژ لەبانیەک پلەی گەرما لە ٤٣ پلە رەد کرد، وەگورەی دەزگای کەشناسی ئەمریکا.
ئەو گەرمی فرە بویە مدوو هەڵوەشانن زنجیرەیگ کۆنسێرت کە بڕیار بوی لە ئیواران گشت کۆتایی هەفتەیل تاوسان لە شارەگە وەڕیەو بچوود.
یە چەن رووژیگە دەسەڵاتدارەیل هەیتاهەیت زەنگ ئاگادارکردن کوتن، و ئامووژگاری دانیشتگەیل کەن کە خوەیان لە جموجویل دەیشت وەرووژانە دویر بخەن، و ئاگادار نیشانەیل هشکەوبوین لەش بوون، کە لە گەرمی وە زوی مەرگبارەو بوود.
و زانایل کەشناسی هووشداری دانە کە "تونترین مەوقەیل شەپوول گەرمی لە کۆتایی ئی هەفتە دەسوەپی کەێد" وەگورەی قسەی ئاژانس فرانس پرێس.
دەسەڵاتدارەیل مەزەنە کەن رووژ یەکشەممە شار نیڤادا سیتی ریکۆرد پلەی گەرمی بشکنێد.
لە ویلایەت کالیفۆرنیا، دووڵ مەرگ ناودیار، کە یەکیگە لە گەرمترین شوینەیل بان زەوی، هاتێ رووژ یەکشەممە شمارەیگ پەیمانەیی توومار بکەێد کە شایەت پلەی گەرمی بڕەسێدە ٥٤ پلەی سەدی.
لە کۆتایی هەفتەی گوزەشتە، بەرزبوین پلەی گەرما بویە مدوو مردن 10 کووچبەر وە درویژی سنوور ئەمریکا وەگەرد مەکسیک، وەگورەی قسەی پۆلیس سنوورەیل.
لە ویلایەت تەکساس، رووژ پەنجشەممەی گوزەشتە، لە شار ئێل پاسۆ پلەی گەرمی زیاتر لە ٣٧.٧ پلەی سەدی ئەرا بیس و هەفتەمیک رووژی توومارکرد.
رووژ سێشەممە کۆشک چەرمگ پەرەپیدان "ستراتیژی گەرمی نیشتمانی" راگەیان. جۆ بایدن، سەرۆک ئەمریکا لە بەیاننامەیگ وت: ملیۆنا هاوڵاتی ئەمریکی لەوەر ئاڵشتبوین کەشوهەوا، کەفنە وەر ئەو شەپوول گەرمی فرە کە سەختی و فرەوانی و ماوەی زیاییگ دیرێد.
