پەرلەمان کۆریای باشوور دەنگ لەبان لاوردن سەرۆک وڵاتەگە دەێد
شەفەق نیوز/ پەرلەمان کۆریای باشوور، رەزامەنی لەبان بڕیار لاوردن سەرۆک دا، ئەوەیش دویای راگەیانن فەرمانەیل سەربازی لە وڵاتەگە، وەگورەی ئاژانس رۆیتەرز.
ئی دەنگدانە دویای ناڕەزایی و رەخنەی فراوانیگ وەلایەن حزبەیل سیاسی و کۆمەڵگای شارستانی هات، کە بڕیار سەرۆک جویر شکانن دەسەڵات و هەڕەشەی دیموکراتی دانە قەڵەم.
ئی کار لەو وەختە تیەێد کە کۆریای باشوور ژاوەژاو سیاسی ناوخوەیی وەخوەی دوینێد، لە وەختیگ پەرلەمان دانوسەنین لەبان کاریگەرییەیل بڕیار سەرۆک لەبان ئارامی و ئاسایش وڵاتەگە کەێد.
دویای ئی بڕیارە، دادگای دەستووری بڕیار دەێد یا یون ئەرا پۆستەگەی گلەو دەێد یا لاوەێدەی، و ئەگەر لاوردەی، یون بوودە دویەم سەرۆک لە میژوو کۆریای باشوور کە پەرلەمان لاوەێدەی، دویای خانمە سەرۆک وەرین بارک کۆن کە لە ساڵ ٢٠١٧ لاوریا.
وەرجەیە، ئاژانس "يونهاب" وت: کۆمەڵگەی نیشتمانی لە کۆریای باشوور، نیاز دەنگدان لەبان پڕۆژەی یاسای نوویگ ئەرا لاوردن سەرۆک یون سۆک دیرێد، لەوەر تەقەلای چەسپانن فەرمانەیل سەربازی لە هەفتەی گوزەشتە.
جی باسە کە لە رووژ یەکشەممەی گوزەشتە، یەکەم پێشنیار لاوردن بون پویچەڵ کریا، لەوەر دابڕیان فرەی نوێنەرەیل حزب دەسەڵاتدار لە دەنگدان، و حزب دیموکرات پەیمان دا کە هەر هەفتەیگ زوور بارێد تا بڕیار لاوردن یون وەڕیەو بچوود.
