رسوایی گەورەیگ لە تورکیا.. بڕیگ پزشک و پەرستار دەسیان هاناو خوین ١٢ کوورپە
شەفەق نیوز/ یە چەن رووژیگە جادەی تورکی باس ئەو تاوانە کەێد کە کەرت تەندروسی وڵاتەگە هاوردە لەرزە، دویای کوشیان ١٢ مناڵ کوورپە لەناو خەسەخانەیل، و بەشیگیان تویش نشانەیل بەدیگ هاتن.
دادگا کەفێدە شوین ٤٧ کارمەن لە کەرت پزشکی، و ٢٢ لەلییان گریانە، لەناویان پزشک و پەرستار و خانمە پەرستار هاناویان، وە توومەت کوشتن ١٢ کوورپە لەلای کەمەو.
توومەتەیل ١٣٩٩ لاپەڕە پەڕەو کەن کە لە دادگای باڵای تاوانەیل لە ناوچەی بکروکی لە شار ئیستەنبوڵ خوەنریا، کە یەکەم دانیشتن دادگا لە رووژ دووشەممەی گوزەشتە دەسوەپی کرد و تا دویەکە جمعە وەردەوام بوی.
لەناو توومەتەیل کارمەنەیل توومەتبار وەگەرد فەرمانبەرەیلیگ لە بنکەیل فریاکەفتن لە ئیستەنبوڵ کەینوبەین داشتنە کوورپەیل ئەرا خەسەخانەیل تایبەت کلبکەن، و بەشیگیان لەژیر چەودیاریکردن هویرد تا ماوەیگ بمینن کە خوەی گرنگ نییە، و دەرمان و راپۆرتەیل پزشکی ساختە وەکار بارن کە گوایە بیماری ئی مناڵەیلە فرە سەختە، تا پویل فرەیگ لە خاوەنیان بوەن.
ناو ١٩ خەسەخانە لەناو لیست توومەتەیل بوی، کە ١٠ خەسەخانە لەلییان تاوانبار دەرکەفتن، و دویای ئەو رسواییە گشتیان بەسیان.
گەورەی ئی چەتەی تاوانکارە پزشکیگە وەناو فورات ساری، کە توومەتبار سەرەکیە لەی تاوانە، و دوو کەس وەگەردی وەگەرد ١٩ کەس ترەک کەفنە دادکاری.
