ئیران...وەفر مەکتەوەیل بەسێد و دەوام حکومەتی پەکخەێد
2023-01-11T08:25:29+00:00
شەفەق نیوز/ شەپوولیگ لە وەفر و واران لە ماوەی 24 ساعەت گوزەشتە رویکردیەسە ناوچەیلیگ لە ئیران و بویە هوکار وەسین مەکتەوەیل و پەککەفتن دەوام فەرمی حکومەت، وەپای دەزگایەیل راگەیانن ناوخوەیی خوەیان.
لە راپۆرتەیل خەوەر دەێد ک شەپوولیگ داوەزین پلەی گەرما و واران و وەفر وارین هاتیەس ئەرا پارێزگا جیاوازەیل ئیران، وە تایبەت لە خوەرئاوا و باکوور خوەرئاوا و باشوور خوەرئاوا و ناوڕاس و خوەرهەڵات و باکوور خوەرهەڵات وڵاتەگە، بویە هووکار بەسیان فرەیگ لە ریەیل مابەین شارەیل و ئاوایەیل وەتایبەت لە ناوچە کویەیلە.
لە راپۆرتەیل باس لەوە کریەێد، بەرزی وەفر لە بڕیگ ناوچە رەسیە زیاتر لە یەک مەتر، دیاریکرد تیم کۆمەڵەی مانگ سوور کارکەن ئەرا ماڵین وەفرەگە و وازکردن ری و قورتارکردن شمارەیگ فرە لە هاوڵاتیەیل ک ماشینەیلیان لەناو وەفر گیرکردیە.
دیاریکرد وەفر وارینەگە لە فرەیگ لە شارەیل وڵاتەگە بویەسە هوکار بەسین مەکتەوەیل وەگەر پەکخستن یان کەمکردن دەوام فەرمی فەرمانگەیل حکومی.
