ئیران لەلای نەتەوە یەکگرتگەیل داد کەێد: چەک حزبەیل ئۆپۆزسیۆن وەتەواوی نەسەنیاگە
شەفەق نیوز/ شاند دیبلۆماسی هەمیشەیی ئیرانی لەلای نەتەوە یەکگرتگەیل، داوای جیوەجیکردن رێککەفتنەیل وەرد حکومەت عراق کرد، لەباوەت بەسانن بارەگایل و چەک سەنین لە حزبەیل کورد ئۆپۆزسیۆن ئیرانی، ئەوانەگ هانە هەرێم کوردستان.
ئەوەیش لە پەیامیگ لەلایەن شاند هەمیشەیی ئیرانی لەلای نەتەوە یەکگرتگەیل ئەرا ئەندامەیل ئەنجومەن ئاسایش هات ک لەناوی باس هەڵویست وڵاتەگەی لە جیوەجیکردن ئۆپراسیۆنەیل سەربازی دژوە بارەگای حزبەیل کورد ئۆپۆزسیۆن لە هەرێم کوردستان کرد.
شاندەگە لە پەیام درویژیگ ک میدیایل راگەیانن ئیرانی فەرمی، ئمڕوو پەنجشەممە، بڵاوی کردن، وت: دویای دانوسەنین فرەیگ وەلایەن کۆمار ئیسلامی ئیران وەرد وەرپرسەیل حکومەت عراق و هەرێم کوردستان، هویچیگ لەنوای ئیران نەمەن مەگەر تەنیا وەکارهاوردن ماف خوەی لە وەرگریکردن لە خوەی، لە چوارچێوەی یاسای ناودەوڵەتی وەخاتر مقەیەتیکردن ئاسایش نەتەوەیی، و لەبان ئەوە، دەسکردە ئۆپراسیۆنەیلی لەبان حزبەیل کورد ئۆپۆزسیۆن لە باکوور عراق.
وەگورەی پەیامەگە، ئیران یە چەن ساڵیگە بویەسە ئامانج پەلامارەیل ئەو حزبەیلە لە هەرێم کوردستان عراق، لەی دویاییە ئەو گرووپەیلە چالاکییان خەسەو کردن، و وەشیوەیگ نا یاسایی بڕەیل چەک فرەیگ رەساننە ئیران ئەرا چەکدارکردن گرووپەیلیان ک نیاز جیوەجیکردن پەلامارەیل تیرۆری دیرن، ک زەرەد مرووی و وەحشیانە زیایەو بوی، و دارایی گشت و تایبەت ویران کریا.
پەیامەگە وتیش: ئیران هاوەگەرد دووپاتکردن لە وەرپرسایەتی حکومەت عراق ئەرا زاڵبوینی وەبان گشت زەویەیل و سنوور ناودەوڵەتی لەی وڵاتە، و بەڵگە و زانیاریەیل چەسپیاگ دادە دەس وەرپرسەیل حکومەت عراق و هەرێم کوردستان لەباوەت (گرووپەیل تیرۆریست و جیاوەکار) ک زەویەیل عراق ئەرا پلان و رێکخستن و جیوەجیکردن کارەیل خراوەکاری و تیرۆری دژوە ئیران بکەێد.
وتیش: لەناو بڕیگ لە دانوسەنین و راویژکاری دووانی وەرد وەرپرسەیل حکومەت عراق و هەرێم کوردستان، لەوانەیش ئەو سەردان دویاییە بویە وەلایەن راویژکار ئاسایش نەتەوەیی عراق ئەرا تەهران وەرجە نزیکەی یەک مانگ، ک ئیران داوا کرد ئەو کەسەیلە ک تاوانیەل تیرۆری جیوەجی کردنە بیەنە دەس ئیران تا لە دادگایل ئیران داد بکریەن، و هەمیش بایەتە بارەگایل ئی گرووپەیل تیرۆریە و سەربازگەیل راهێنانیان بوەسیەن، و چەک لە ئەندامەیلیان بسینیەێد.
هەمیش وت: وەو جورەگ ئیران دووپات لە گرنگی هەسی هیزەیل سەربازی عراق لەبان سنوور ناودەوڵەتی دوو وڵاتەگە کرد، شاند عراق ڕازی لەی داوایلە بوی، و پابەند وە داناین مەوقەیگ ئەرا تەواوکردن بیچەککردن ئی گرووپەیل تیرۆریە، -وەگورەی قسەی خوەی-.
وتیش: وەداخەو ک تا ئمڕوو هویچ کار گورجیگ ئەرا جیوەجیکردن ئی رێککەفتنە نەکریا، ئەراوە ئیران داوای دووپاتکردن لە جیوەجیکردن ئی رێککەفتنە کەێد.
شاندەگە وتیش: لەی رەوشە هویچیگ لەنوای ئیران نەمەن مەگەر تەنیا وەکارهاوردن ماف خوەی لە وەرگریکردن لە خوەی لە چوارچێوەی یاسای ناودەوڵەتی وەخاتر مقەیەتیکردن ئاسایش نەتەوەیی و وەرگریکردن لە گەلەگەی، ک لەی دویاییە ئۆپراسیۆنەیل سەربازی و گرنگ دژوە (گرووپەیل تیرۆری) لە هەرێم کوردستان عراق جیوەجی کرد، ک وە پلان هویردیگ شوین تیرۆریستەیل کردە ئامانج.
دووپات کرد ک کۆمار ئیسلامی پابەندە وە چارەکردن ئی باوەتە وەرد حکومەت عراق وە میکانیزمیگ دووانی جویر بەشیگ لە جەنگ وەردەوام دژوە تیرۆر.
شاندەگە لە کۆتایی پەیامەگە وت: کۆمار ئیسلامی ئیران رێز تەواوی لە ئاسایش و ئارامی عراق گرێد، و جاریگتر دووپات لە سەڵامەتی زەویەیل کۆمار عراق و یەکێتی و سەروەریی کەێد.
