ئیران خوازێد وە تەکنەلۆژیا ئەو خانمەیلە بناسێد ک پاپەی "حیجاب" نیین
شەفەق نیوز/ رووژنامەی "دا گاردیان" وت: حکومەت ئیران کار لە وەکارهاوردن تەکنیگ دەمچەو ناسین لەناو گواستنەوەی گشتی کەێد، تا ناسنامی ئەو ژنەیلە دیاری بکەێد ک رازی نیین پابەند وە یاسای حیجاب بوون.
سکرتێر " الأمر بالمعروف والنهي عن المنكر" لە ئیران، محمد ساڵح هاشمی گوڵپایکانی وت: حکومەت پلان وەکارهاوردن تەکنەلۆژیای چەودیریکردن لەنان ژنەیل دانەێد ئەرا جیوەجیکردن یاسای نوویگ ک ئیبراهیم رەئیسی سەرۆک وڵاتەگە داناسەی، ک مەرجەیلیگ لەبان پڕتاڵ ژنەیل دانەێد.
یاساگە دویای یەک رووژ لە ئاهەنگ رووژ "حیجاب و داوانپاکی" واژوو کریا، ک بویە هووکار ناڕەزایی فرەیگ لەلاین ژنەیل، و خانمەیلیگ چالاکوان وینەیل خوەیان وە سەر رویت لە شوینەیل گشتی لەابان سۆشیال میدیا بڵاو کردن، و دەسەڵاتەیلیش وە هەڵمەتیگ دەسگیرکردن فراوانیگ هاتنە دەنگ، ک بڕیگ لەلیان دەسگیر کریا، و ناچاریان وە وتن قسەیلیگ لەبان تەلەڤزیۆن کریا.
دەسەڵاتەیل ئیران زیاتر لە ٣٠٠ چالاکوان دژوە چەسپانن حیجاب لە کۆمار ئیسلامی دەسگیر کردن، وەگورەی قسەی ئاژانس "فارس" لە زوان گوڵپایکانی.
لە پارچە ڤیدیۆیگ، گوڵپایکانی وت: ئیسە تەکنەلۆژیا ری دەێد وە نشاندان وینەیل و ئاشکراکردن ئەو ژنەیلە ک پابەند وە حیجاب نیەوون، وتیش: باج کوتپڕی وەنامە ئەرایان کلکریەێد.
گوڵپایکانی وەرجەیە وتیە: شمارەی ئەو ژنەیلە ک حیجابیان بەدە لە ٥٠% زیاترە.
لە ساڵ ٢٠١٥ تا ئیسە حکومەت ئیران کار لەبان کارتەیل بەڵگەی بایۆمەتری کەێد، ک وینە وشیوەی چەو و پەنجەموور هاناوی، ک وەیجویرە ئاسان بوود وینەی هەر کەسیگ بناسێد.
ئازادە ئەکبەری خانمە تۆێژینەر لەزانکۆی توینتی لە هۆڵەندا ئەرا رووژنامەی گاردیان وت: بەش گەورەیگ لە ئیرانیەیل ئیسە هانە ناو بانک زانیاریەیل بایۆمەتری نیشتمانی، ک کارەیل فرەیگ پشت وەو کارتەیل بایۆمەتریە بەسانە، ئەراوە حکومەت توەنێد بڕەسێدە گشت دەمچەویگ، و وە کوتپڕ شیوەی هەرکەسیگ وە لەناو پارچە ڤیدیۆیگ دیاری کەێد.
وتیش: وەی کارە، حکومەت خوازێد وە گشت کەسیگ لەی وڵاتە بویشێد: مەزەنە نەکەێ ک چشت بویچگیگ لەناو پاسیگ لە شوینیگ بوود لە هویرەو چوود، ئیمە زانیمن توو کیێ، و ئەوەسا پەیاد کەیمن، و دویای ئەوە بایەتە سزای خوەد بوینێ.
ئەنابیل سریبیرنی خانمە مامووستای فەخری لە ناوەند توێژینەوەیل ئیرانی لە زانکۆی سواس لە لەندەن، رەخنەی ئیبراهیم رەئیسی سەرۆک ئێران کرد ک ئەرا گاردیان وت: لە وەختیگ ئیران کەفێدە وەر گرفتەیل ئابووری وژینگەیی فرەیگ، و هاتێ ئاست پەنام لە ئیران بڕەسێدە ٥٠ لەسەد، باوجی حکومەت هویری خستیەسە لای ماف ژن.
سریبیرنی وتیش: لەلای منەو یە بەشیگە لە حکومەتیگ شکستی، رەفتارکردن وەرد ئی باوەتەیل گەپە لە بینایل ژیرین وژینگە خەێدە پشتگووش، و زووری تیرێدە بان ژنەیل، چوینکە ئامانج ئاسانیگە.
