ئۆکرانیا بڕ ئەو ناوچەیلە دیاری کەێد ک دویای تەقیان بەنداو کاخۆڤکا نقوم بوینە
2023-06-08T09:47:02+00:00
شەفەق نیوز/ وەرپرسیگ ئۆکرانی، ئمڕوو پەنجشەممە، راگەیان؛ لافاویگ ک لەئەنجام ویرانبوین بەنداو کاخۆڤکاوە، زیاتر لە 600 کیلۆمەتر چوارگووشە لە باشوور ئۆکرانیا، لە کەنار راس چەم دنیپرۆ ک ها ژیر کۆنترۆڵ ئۆکرانیا نقوم کردیە، و هەرلیوا لە کەنار چەپی ک ها ژیر دەس رووسیا، لە ژیر ئاو نقوم بوینە.
ئەلێکساندر پرۆکودین، قایمقام ناوچەی خێرسۆن لە سۆشیال میدیا راگەیان: "لە ناوچەی خێرسۆن 600 کیلۆمەتر چوارگووشە لافاو هەڵسیاس، 32% لە کەنار راس و 68% لە کەنار چەپ" وتیش؛ ئاست لافاو رەسیەسە 5.61 مەتر ، و وەکەرۆ رخەیل و بومبواران تون رووسیا چووڵکردن ئەو ناوچەیلە وەردەوامە.
پرۆکودین وتیش: رەوش ئەو ناوچەیلە ک هانە ژیر دەس رووسیا فرە سەختە.
دەزگای فریاکەفتن دەوڵەتی ئۆکرانیا راگەیان؛ هەزار و ٩٩٥ کەس ناوچە نقومبویەیل چووڵ کردنە ک ١٠٣ کەسیان مناڵن.
وتیش؛ لە دیمە چەمەگەی ئۆکرانیا 20 ئاوای و 2629 ماڵ کەفتنە ژیر ئاو، لافاو بەشیگ لە خێرسۆن پایتەخت ناوچەگە نقوم بویە.
