ریخریاییگ ژاپۆنی خەڵات نۆبڵ ٢٠٢٤ ئەرا ئاشتی وەدەس تیەرێد
شەفەق نیوز/ دەسەی خەڵات نۆبڵ لە نەرویج، ئمڕوو جمعە، راگەیان کە ریخریاگ ژاپۆنی نیهۆن هیدانکیۆ خەڵات نۆبڵ ئاشتی ساڵ ٢٠٢٤ وەدەس هاورد، ئەوەیش وەخاتر “تەقەلایلی ئەرا رەسین وە جەهانیگ دویر لە چەک ئەتۆمی”.
نیهۆن هیدانکیۆ بزووتنەوەیگ جەماوەریە لە رزگاربویەیل ئەو بۆمبە ئەتۆمیویلە کە لە ساڵ ١٩٤٥ وەبان هێرۆشیما و ناگازاکی وەشیان و وە "هیباکوشا" ناسیان.
یۆرگن واتنی فرێنێس، سەرۆک دەسەی نۆبڵ نەرویج، لە راگەیانن ناو براوەیل، وت: دەسەگە ڕێزگرتن لە ریخریایەگە هەڵوژاردیە “وەرانوەر تەقەلایلی ئەرا جەهانیگ دویر لە چەک ئەتۆمی، و چەسپانن ئەوە کە چەک ئەتۆمی هەرگیز نەبایەس دووارە وەکار باێد.”
ئاژانس فرانس پرێس لە زوان ریخریاگە خاوەن خەڵاتەگە باس غەززە وەرانوەر “ژاپۆن ٨٠ ساڵ وەرجە ئیسە” کرد.
ئمساڵ ٢٨٦ کاندید هەڵوژیان، کە ناسنامەیان ئاشکرا نەکریاس و تا ماوەی ٥٠ ساڵ وە نهێنی مینێدەو ئیمە تەنیا ئەوە زانیمن کە لەناویان ١٩٧ کەس و ٨٩ ریخریاگ ە.
مەوقەی خەڵاتەگە وەگەرد دیمەنیگ تاریک تیەێد لەوەر جەنگەیل خوەرهەڵاتی ناوڕاس و ئۆکرانیا و ورسگی لە سودان و رخبەرەیل کەشوهەوا.
