دوو هەفتە دویای کەفتن فڕۆکەگەیان لە ئامازۆن.. چوار منداڵ وەزنی پەیا کریان

 دەسەڵاتدارەیل کۆڵۆمبیا راگەیانن؛ 4 مناڵ وە زنی پەیا کریانە،  دویای ئەوەگ زیاتر لە دوو هەفتە وەرجە ئیسە دویای وەخوارکەفتن فڕۆکەگەیان لە جەنگەڵەیل ئەمازۆن، یەیش هەواڵیگ خوەشە ئەرا گشت وڵاتەگە.

گوستاڤۆ پێترۆ سەرۆک وڵاتەگە لە هەژمار تایبەت خوەی لەبان تویتەر نویسان: دوای تەقەلا سەختیل مینەکردن وەلایەن هیزە سەربازیەیلمان، ئەو چوار زاڕووە پەیا کردیمن، ک وەمدوو کەفتن فڕۆکەگە گوم بوین، و ئەوانیش هانە بان ژیان.

 لەلای خوەییش، هیزە چەکدارەیل ئاشکرا کرد ک تەقەلایل مینەکردن سەختەو بوین دویای ئەوەگ رزگارکەرەیل پەناگەیەگ پەیا کردن کە وە شیوەیگ هەڵەپەڵە وە چوو و پەل دار دروسکریاگە، ئەوەیش باوەڕیان زایەو کرد ک هیمان ئەو زاڕووەیلە  هانە ژیان.

لەو وینەیلە کە هیزە چەکدارەیل بڵاوی کردن، قەیچی و کراواتیگ قژ لە ناوەین پەلەیل زەوی دارسانەگە دەرکەفتیە و وەرجە ئەوەیش بوتڵیگ شیرنووشین مناڵ و پارچە میوەیگ نیمە خوریاگ پەیا کریا.

تیمەیل فریاگوزاری وتنە ئەو چوار کەسە  ک سێ مناڵ تەمەن 13 و 9 و 4 ساڵ و مناڵیگ تەمەن 11 مانگە، لە دویای وەخوارکەفتن فڕۆکەگەیان لە یەکەم ئایارەو لە دارسان پاکیزەی پارێزگای کاکیتای باشوور سەرگەردانن.

دەسەڵاتدارەیل زیاتر لە 100 سەرباز وە سەگ زوانفام کل کردن  ئەرا مینەکردن ئەو مناڵەیلە ک لەناو فڕۆکەیگ بوینە هەنای لە ناوچەی ئەمازۆن کەفتە خوارەو و لە رویداویگ دایگیان و دوو کەستر گەورە گیانیان لەدەسدان.