دوو مردن و ٤٣ تووشهاتن کۆڕۆنا لە ئیدارەی سەروەخوەیی
![دوو مردن و ٤٣ تووشهاتن کۆڕۆنا لە ئیدارەی سەروەخوەیی](https://media.shafaq.com/media/arcella/1621346535163.jpeg)
شەفەق نیوز/ دەزگای تەندروسی لە ئیدارەی سەروەخوەیی لە باکوور و خوەرهەڵات سوریا، ئمڕوو پەنجشەممە، راگەیان تۆمارکردن دوو مردن لەوەر ڤایڕۆس کۆڤید-١٩.
دکتۆر جوان موستەفا هاوسەرۆک دەزگای تەندروسی لە ئیدارەی سەروەخوەیی لە باکوور و خوەرهەڵات سوریا لە بەیاننامەیگ رەسیە ئاژانس شەفەق نیوز وت: مردنە نووەکان ئەرا ژنیگ لە حەسەکە و پیاویگ لە قامیشلۆ تۆمار کریان.
موستەفا دووپات کرد ک ٤٣ تووشهاتن نوو وە ڤایڕۆس کۆڤید-١٩ لە ناوچەیل ئیدارەی سەروەخوەیی ئەرا ٢٠ پیاو و ٢٣ ژن تۆمار کریا، و هەمیش وەگەرد چوار خاسەوبوین.
تووشهاتنە نووەکان وەیجوورە بەشەو بوین: ١٧ حەسەکە، ١٠ قامیشلۆ، ٦ دێرک، ١ عامودا، ٥ دەرباسیە، ٢ ریقە، ١ مەنبج، ١ کامپ هۆل.