دویەم تونوتیژترین زریان لە باشوور خوەرهەڵات ئەمریکا.. “هێلین” ٢٠٠ کوشیای و ویرانکاری گەورەیگ دروس کەێد
شەفەق نیوز/ لەئەنجام زریان هێلین کە چەن ویلایەتیگ باشوور خوەرهەڵات ئەمریکا گردەو، زیاتر لە ٢٠٠ کەس گیانیان لەدەسدان و ویرانکارییگ فراوان لەلی بویەو، وەیەوە بوودە دویەم کوشندەترین زریان کە لە ماوەی زیاتر لە نیم سەدە لە وڵاتەگە بەێد.
شماردن ئاژانس فەرەنسی، وە پشتبەسین وە ئامارە فەرمییەیل، دەرخست کە ٢٠١ کەس لە ویلایەتەیل کارۆلینای باکوور، کارۆلینای باشوور، جۆرجیا، فلۆریدا، تێنسی و ڤێرجینیا گیانیان لەدەسدانە، کە وەیەوە هێلین بویە دووەم کوشندەترین زریان لە ئەمریکا لە زیاتر لە نیم سەدە، دویای زریان کاترینا لە ساڵ ٢٠٠٥.
وەگەرد سەدان ئۆپەراسیۆن ڕزگارکردن لە شەش ویلایەت و وەڵامدان فراوان کە زیاتر لە 10 هەزار کارمەن فیدراڵی لەناویان بوی ئەرا هاوکاریکردن ڕزگارگەرەیل ناوخۆیی، مەزەنە کریەێد شمارەی کوشیاگەیل بەرزەو بوود، چوینکە فرە لە دانیشتگەیل لە ناوچە کویەیلە بریاگەیل بیسەروشوینن.
لە نوووترین رویداوەیل، ناوچەی بنکۆمب لە ویلایەت کارۆلینای باکوور کە زیاتر لە ٦٠ کەس کوشیانە، راگەیان کە "وەردەوامە لە مینەکردن رزگاربویەیل"، و کەسەیلیگ هیمان لە جەهان بڕیانەسەو، لەوەر رمیان زەوی و ویرانی پیەڵەیل.
برایان کێمپ، پارێزگار جۆرجیا، کە شمارەی کوشیاگەیلی ئەرا ٣٣ کەس بەرزەو بویە، وت: هویر و نزامان وەردەوام ئەرا خانەوادەی ئەو کەسەیلە کە ئی خەم و ئی کارەساتەیلە وەسەریان هات.
جۆ بایدن، سەرۆک ویلایەتە یەکگرتگەیل ئەمریکا ئەرا دویەم رەوژ سەردانەیلی ئەرا ویلایەتە زیانلیکەفتگەیل ئەنجامدا، کە رووژ پێەجشەممە ویلایەت فلۆریدا بوی، کە هەفتەی گوزەشتە زریانەگە لە کەناراوەیل باکووری کەنداو جویر زریانیگ پۆلی 4 رویدا و خێرایی واگە 225 کیلۆمەتر لە ساعەتیگ بوی.
بایدن لە ئاسمانەو نووڕستە کاولبوینەگە، ئیجا گەردیە بان ماڵ و بینا ویرانەیل کەنار کیتۆن بیچ، کە نزیکە لەو شوینە کە زریانەگە لەناوی رەسیە بان زەوی.
