دویەت ماڵکۆلم ئێکس داوای خوین باوگی لە دەسەڵاتەیل ئەمریکا کەێد

دویەت ماڵکۆلم ئێکس داوای خوین باوگی لە دەسەڵاتەیل ئەمریکا کەێد
2023-02-22T08:59:00+00:00
شەفەق نیوز/ دویەت چالاکوان مافپەروەری (مالکۆڵم ئێکس)، ک وەرجە ٥٨ ساڵ کوشیاگە، ئاگادار دەسەڵات دادوەری ئەمریکا کرد، ک خوازێد دادکاری (سی ئای ئی) و (ئێف بی ئای) و پولیس شار نیویۆرک لە ئەمریکا بکەێد، وەتوومەت کوشتن باوگی.

مالکۆڵم ئێکس لە پۆست قسەکەر فەرمی (نەتەوەی ئیسلام) بوی ک کۆمەڵەیەگ ئەمریکی ئەفریقایی موسوڵمان بوین، پشتگیریکردن سەروەخوەیی سیا رەنگەیل کردیاد.

ئیلیاسا شباز توومەتبار بڕیگ لە ئاژانسەیل فیدڕاڵی و حکومەتەی لە نیویۆرک کرد، وە گوماکردن بەڵگەیل پلان کوشتن مالکۆڵم ئێکس و جیوەجیکردن پلان کوشتنی.

شباز لە کۆنگرەیگ رووژنامەوانی لەوشوینە ک باوگی لەناوی  کوشیا، وت: بنەماڵەی ئیمە چەنای چەن ساڵە رەنج دەێد تا راسیەگەی کوشتنی ئاشکرا بکەێد. 

هەر لەو شوینە ک لەناوی کوشیا، پەیکەریگ ئەرا مالکۆڵم ئێکس دروس کریاگە.

پولیس نیویۆرک و ئێف بی ئای و سی ئای ئەی هویجیگ لەبان ئەو توومەتەیلە نەهاتنە دەنگ.

مالکۆڵم ئێکس، زیاتر لە پانزە ساڵ وەگەرد ئەو کۆمەڵە بوی، تا تویش بیئومیدی هات، و لە ساڵ ١٩٦٤ لەلیان جیاوە بوی، ک دویای ئەوە (نەتەوەی ئیسلام) لەلی تویڕە بوین، و هەڕەشەی کوشتنی دان.

مالکۆڵم ئێکس لە تەمەن ٣٩ ساڵان بوی، هەنای لەبان شانۆی هۆڵ ئودوبون لە نیویۆرک لە ٢١ شوبات ١٩٦٥، سێ کەس چەکدار گولەوارانی کردن و کوشتنەی.

شباز ئەو مەوقە تەمەنی دوو ساڵ بوی، و لە رویداو کوشتن باوگی وەگەرد داڵگ و خوەشکەیلی ئامادە بوی.

شباز لە ئاگاداریکردن دادگا، داوای ١٠٠ مەلیۆن دۆلار کرد جویر قەرەبوو.

Shafaq Live
Shafaq Live