دەسگیرکردن شاجوان تورکیا وە توومەت سووکایەتیکردن وە ئەردۆگان

شەفەق نیوز/ دەسەڵاتەیل ئەمنی لە تورکیا، بانۆ ئۆزتورک خانمە شاجوان وەرین و نمایشکار پڕتاڵ دەسگیر کردن، وە توومەت سووکایەتیکردن وە رەجەب تەییب ئەردۆگان سەرۆک تورکیا لەبان سۆشیال میدیا، وەگەرد زیایبوین ناڕەزایەیل جەماوەری لە وڵاتەگە.

وەگورەی سەرچەوەیل رووژنامەوانی، داواکاری گشتی لە بیکوز، لێکولینەوە لەبان بانۆ ئۆزتورك واز کرد، کە لە ساڵ بویە خاوەن نازناو شاجوان تورکیا 2009، لەبان رەخنەگردن لە ئینترنێت، لە دەسگیرکردن ئەکرەم ئیمام ئۆغڵو سەرۆک شارەوانی ئیستەنبوڵ، کە ئی گامە بویە مشتومڕ گەورەیگ لە وڵاتەگە.

 ئۆزتورك لە بڕیگ زنجیرە دراما بەشداری کردگە، بیجگە کارەی لە نمایشکاری پڕتاڵ.

هەرلیوا، دەسەڵات تورکی وەردەوامن لە دەسگیرکردن ناڕەزایەیل، کە لە شارەیل ئیستەنبوڵ و بۆرسە، دویەشەو دەیان لە ناڕەزایەتییەیل دەسگیر کریان.

 وەگورەی سەرچەوەیلگ تورکی، شمارەی ئەو کەسەیلە کە دەسگیر کریانە رەسیە زیاتر لە 1400 کەس، لە وەختیگەو دەسوە ناڕەزایەتی کریاس وەرجە نزیکەی بوی هەفتە، لەناو زیایبوین تویڕەیی جەماوەری لەبان بڕیارەیل حکومەت.

ناڕەزایەیل دووپات کەن کە هەرچەن لەلییان دەسگیر کریەن و کەفنە وەردەوەردە وەرد پولیس، هەر وەردەوامن لە خوەینشاندان، لە وەختیگ سەرۆک رەجەب تەییب ئەردۆگان وت: ئی کارە تەنیا نمایشکردنە کە وە ئامانج نیەڕەسێد.