دەسگیرکردن کابرایگ لە نەیجیریا دگان مردگەیل کیشێد

شەفەق نیوز/ تووڕ ئاسایش "ئوسۆن" لە نەیجیریا،  کابرایگ وەناو "ئەفیز ئۆدیوسانیا، ٣٣ ساڵان" دەسگیر کرد،  وەتوومەت دگان کیشان مردگەیل لەناو قەورسان،  ئەرا وەکارهاوردنیان وە کارەیلیگ جادوبازی، ک گوایە لەو جادوە پۊل کەفێدە دەس. 

ئەفیز ئاشکرا کرد ک خوەی لە ساڵ ٢٠١٦ دەسکردیەسە ئی تەقەلا، باوجی دوو گلە شکست هاورد، و جادوەگەی سەرنەکەفت، دویای ئەوە ک دگان دوو تەرم لە ساگامو کیشایە. 

توومەتبارەگە وتیش: ئەو دوو تەرمە یەکیگیان لە ساڵ ٢٠١٦ و ئەوەکە لە ساڵ ٢٠٢٠ لە قەورەگە دراوردیە و دگانیان کیشاگە، باوجی ئەرا گلەی سێیەم دەسگیر کریاگە، هەنای خوازیە تەرمیگ لە قەورسان ئیلیشا درارێد.   

وەگورەی سایت "Vanguardngr"، توومەتبارەگە ئاشکرا کردیە ک ئەو تەرمەیلە لە ساگامو لە ویلایەت ئوجۆن  دراوردیە، باوجی لە ئوسۆن دەسگیر کریاگە، هەنای تواستیە دگان یەکیگ لە تەرمەیل بکیشێد.   

ئەفیز وتییشە، کارەگە نزیکەیل نیم ساعەت کیشێد تا دگان مردگ بکیشێ، و تەمەی ئەو گەنجەیلە کرد ک تەقەلا دەن وەخاتر جادویگ ئەرا وەدەسهاوردن پۊل ئی کارە بکەن، واز بارن چۊنکە راس نییە، و جادوەگە پۊچەڵە.