دەسگیرکردن 100 چالاکوان یەهودی ری لەنوای دەسەی بایدن بەسانە لە نیویۆرک

کۆمەڵەی "دەنگ یەهودی لە پێناو ئاشتی (JVP)"، خوەنیشاندانیگ لەنوای خوەرهەڵات بان شارەگە رێکخست، چالاکوانەیل جادەی پەنج لە جادەی 82 بەسان، هەنای بایدان لە شوینیگ نزیک لەورا بەشداری  هەڵمەت جەمەوکردن بەخشینەیل کرد.

جای سابر لە کۆمەڵەی JVP وت: " جویر یەهودیگ لە دانشتگەیل نیویۆرک، توەیمن وەشیوەی ئاشکەرایگ رووشنیبکەیمن کە بایدن لە شارەگەمان پیشوازی لەلی نیەکرێد چوینکە وەردەوامە لە پویل ناردن و چەکدارکردن ئەرا ئەو کۆمەڵکوشیە کە حکومەت ئیسرائیلی دژ وە فەلەستینیەگان لە غەزە ئەنجامی دەن".

مایا ئیدیری چالاکوان لە JVP دیاریکرد،  لە دویای 7 ئۆکتۆبەر یە یەکەمین سەردان بایدنە ئەرا نیویۆرک، هەمیش دیاریکرد" لەجیاتی ئەوەگ جواو زۆرینە بدەێد کە داوای ئاگربەست کەن، لە پشت دەرەیل بەساگ وەگەرد کۆمپانیاگان ئەرا وەخشین کووەوبوود".

هەمیش JVP لە بەیاننامەیگ وت: " سوپای ئیسرائیلی زیاتر لە 27 هەزار فەلەستینی لە غەزە کوشتیە، کە زیاتر لە 11 هەزاریان مناڵن، لەماوەی چوار مانگ گورزەیل و پەلاماردانەیل سەربازی، ئیرنگە غەزە ئەرا ژیان گونجیاگ نییە، گورزە ئاسمانیەیل ئیسرائیلی   70% لە ژیرخان ئابووری لەناوبردنە، لەناویانیش خەسخانە و زانکۆگان و تووڕەیل کارەبا و ئاو، و نزیکەی دوو میۆن کەس لە ماڵیان واینە، 1.9 ملیۆن کەس لە شار رەفح باشوور زندگی کەن،  وەی دیاییە سووپای ئیسرائیلی دەسکردیە وە گورزەیل ئاسمانی وەبانی".