خانمە مامووستایگ ئەفغانی وە رۊیداری تاڵیبان هووکارەی دۊیەتەیلە کەێد
شەفەق نیوز/ وەماوەی سێ مانگ گوزەیشتە، دەسەڵاتدارەیل نوو ئەفغانستان ناچار گشت دۊیەتەیلە کردن لەبن ماڵ بنیشن، و نەڕەسنە مەکتەو، و وەگەرد گومابۊی ئومید دۊیەتەیلە لە خوەنستن و درەوسکردن دۊیارووژ خوەیان، یەکیگ لە خانمە مامووستایلە بریار رۊیداریگ دا، و پڕۆژەی مەکتەویگ واز کرد، وەناو پڕۆژەی ئەنجیلا گیور، و مەکتەویگ لەبان ئەنتەرنێت دامەزران، و وەماوەی چەن هەفتەیگ نزیکەی هەزار خانم خوەنەوار ناو خوەیان لەی مەکتەوە نۊسانن، و زیاتر لە ٤٠٠ مامووستا خوەیان ئەرا دەسمیەتی پەخشان.
وەخاتر مقەیەتیکردن خوەیان، ناو گشت دۊیەتەیل ئەو مەکتەوە ئاڵشت کردن.
لە وەختیگ بزووتنەوەی تاڵیبان بڕیار بەسیان گشت مەکتەوەیل دۊیەتەیلە دان، نەسرین و خوەشکەیلی تەقەلای فرەیگ دان تا لە کابوڵ لەماڵەو خوەنستن خوەیان بووەنە ری.
وەلێ کارەگە ئاسان نییە، وەتایبەت ئەرا دوو خوەشکە گەورەیلەی ک یەکیگیان پزشکی خوەنێد و ئەوەکە ئەندازیاری. نەسرین سیانزە ساڵان ئۊشێد؛ گشت ئومیدەیلمان فەوتیان، ئەگەر دووارە مەکتەویش واز بکەن، هەمیش جۊر جارانی نییە، خوەشم هات بوومە رانندەی فڕۆکە، وەلێ یە بۊیە خەو دروویگ، ک تاڵیبان ری ٣ری چشتە نیەێد. وەلێ لەبان ئەوەیش،
وەرجە چەن هەفتەیگ، بڵۊیزەی ئومیدیگ پەیا بۊی، ک نەسرین و خوەشکەیلی لە مەکتەویگ لەبان ئەنتەرنێت ناو خوەیان نۊسانن، ئەو مەکتەوە وەناو (مەکتەو هیرات لەبان ئەنتەرنێت) ک خانمە مامووستایگ لە دەیشت ئەفغانستان جیگرە، ئی مەکتەوە دامەزرانیە، تا دەسمیەتی نزیکەی هەزار خانم خوەنەوار بەێد.
لە وەختیگ نەسرین و خوەشکەیلی لەبن ماڵەگەیان لە کابوڵ نیشتنە، ئەنجیلا گیور لە پەنجەرەی ماڵەگەی نووڕێدە دریاگە، لە کناراو باشووری لە ئینگلترا.
