خامەنەئی هوشداری وە ترەمپ دەێد
شەفەق نیوز/ عەلی خامەنەئی ریبەر باڵای ئیران، ئمڕوو دووشەممە، باس ئیسرائیل کرد کە هاز جینشین راسگانیە لە ناوچەگە، و هوشداری لە وەڵامیگ سەخت دا ئەرا هەر پەلاماریگ وەبان ئیران لەلایەن ئەمریکا.
خامەنەئی لە وتار نماز جەژن رەمەزان وت: قەوارەی سەهیۆنی پلان داگیرکارەیل جیوەجی کەێد و تاوان و جینۆساید کەێد، باس پەلامارەیل دووارەبویی وەبان سوریا کرد و رەسینی ئەرا نزیک دیمەشق.
خامەنەئی وتیش: هەڵوێست ئیمە ئاڵشت نەویە، و ئەگەر سەهیۆنیەیل هەر دوژمنایەتییگ جیوەجی کردن، دەسوەشان سەختیگ وەرگرن، دووپاتیش کرد کە گەل ئیران کەفێدە ئامادەباشی تەواویگ ئەرا وەڵامدان هەر تەقلایگ ئەرا دروسکردن فیتنە لەناو وڵات.
خامەنەئی هوشداری دا کە ئەمریکا چەپاڵەی سەختیگ خوەێد ئەگەر وەگورەی هەڕەشەیل سەرۆک دۆناڵد ترەمپ رەفتار کرد و بمباران ئیران کرد، ئەگەر نەڕەسیە رێککەفتن ئەتۆمی نوویگ وەرد واشینتۆن.
خامەنەئی دووپات کرد کە خوەرئاوا بوخت وە گەنجەیل ئازاد کەێد کە ئەژیندای جینشینی جیوەجی کەن، لە وەختیگ هاز جینشین راسی خوەی قەوارەی سەهیۆنیە کە کار ئەرا داگیرکارەیل کەێد، دووپات کرد کە لاوردن ئی قەوارە لە ناوچەگە وەرپرسایەتی گشتیە، بایەسە گشتی تەقەلای جیوەجیکردنی بەێد.
