خامەنەئی پەنج رووژ پرسە دانەێد و باقری وە وەزیر دەیشت دیاری کەێد و شەش دەسە ئەرا وەڕیەوبردن وڵاتەگە
قسەکەر حکومەت ئیران وت: شەش دەسە ئەرا وەڕیەوبردن کاروبارەیل وڵاتەگە لەی ماوەی دروس کریا.
دیاری کرد کە گردەوبوین حکومەت عەلی باقری وە وەزیر دەیشت دانا لە جیای عەبدولڵاهیان.
لەلای خوەییش، عەلی خامەنەئی ریبەر ئیران، ٥ رووژ پرسە راگەیان، دویای کوشیان سەرۆک و شاند یاوەری وە رویداو کەفتن هیلیکۆپتەرەگە.
وتیش: وەگورەی مادەی ١٣١ لە دەستوور، محمد موخبر دەسەڵات جیوەجیکردن وەڕیەو بەێد، و بایەسە وەرد دوو سەرۆک تەشریعی و دادوەری کار بکەێد تا وەماوەی ئەوپەڕی پەنجا رووژ هەڵوژاردن سەرۆک نوو جیوەجی بکریەێد.
شەوەکی ئمڕوو دووشەممە، تەلەڤزیۆن فەرمی ئیران، مردن رەئیسی و عەدولڵاهیان وە کەفتن کۆپتەریان راگەیان.
هەلیکۆپتەرەگە لە ناوچەی کویەی سەخت جلفا لەناو کەشوهەوای سەختیگ کەفتە خوار، ئەوەیش مەوقەی گلەوخواردن رەئیسی لە ئاهەنگیگ کە شەوەکی یەکشەممە وەگەرد ئیلهام عەلیێف هاوتای ئازەربایجانیی ئامادە بوی، ئەرا دەسکردن وە کار بەنداویگ هاوبەش لەبان چەم ئاراس لەبان سنوور دوو وڵات.
