حکومەت مەغریب: شمارەی گیان لەدەسدان زەویلەرزەگە رەسیە 2012 کەس
2023-09-10T11:03:26+00:00
شەفەق نیوز/ وەزارەت ناوخوەی مەغریب، ئمڕوو یەکشەممە، دویا ئامار قوربانیەیل زەویلەرزەگەی وڵات مەغریب راگەیان و ئاشکەرایکرد 2012 کەس گیان لە دەسدانە.
وەزارەتەگە لەبەیاننامەیگ راگەیان، " شمارەی گیان لەدەسدانەیل بەرزەوبویە و تا ساعەت 10 دویەشەو رەسیە ئەرا 2012 و زەخمداربوین 2059 کەس لەو شمارەش هەزار وو چوارسەد و چوارکەسیان بارودۆخیان سەختە".
ئاشکەرایکرد، " دەسڵات گشتی وەردەوامە لە تەقەلایەیلیان ئەرا قورتارکردن و دراوردن زەخمدارەیل، و جەمەوکردن گشت کومەکیگ پێویست ئەرا چارەسەرکردن کاریگەری ئێ کارەساتە".
