توێژینەوەیگ وردەکاریەل سەرنج راکێش دەربارەی کۆڕۆنا ئاشکرا کەێد
شەفەق نیوز/ توێژینەوەیگ نوو ئاماژەدا ک پەتای ڤایڕۆس کۆڕۆنا جوور پەتایگ وەرزی دانریەێد، ولە رەوش كەشوهەوای دیارییگ بڵاوەبوود، وەگورەی رۆژنامەی دایلی میڵ.
توێژینەوەکارەیل دین ک ئەو ناوچەیلە لەوختیگ زوینە پەتاگ لەناویان بڵاوەبویه، کەفێدە خود شوونەگە لە هەێڵ پانی باکووری، جوور ووهان و دایگۆ لە ئاسیا، میلان وپاریس لە ئۆڕۆپا، وسیاتڵ لە ئەمریکا.
وەگورەی توێژینەوەگە، ئەو ناوچەیلە له ناونی کانون یەکەم و ئادار هاوبەشبوین لە ئاست پلەی گەرمی وداوەزین رێژەیی لە تەڕی،.
دیارە ک ئەو رەوشەیلە ئووشێد ک ڤایڕۆسەگە جوور ڤایرۆسەیل هەناسەی وەرزی جوور فلاوەنزا رەفتار کەێد، و لەزمسان وەشیوەیگ زویتر بڵاو بوود، ولەوەختەیل زوینە لە وەرز وەهار.
تیم توێژینەوەگە لە زانکۆی میریلاند ئەمریکی وت؛ نەخشەگان توێەنن هاوکار زاناگان وسیاسەتمەدارەیل بوون ئەرا پێشبینی لە باوەت ئه‌وه ك له کاملا و کەی ئی ڤایڕۆسە بڵاوبوود، یه‌ش بوودە دەرفەتیگ ئەرا وەکارهاوردن رێکارەیل و مقەیەتیەیل گونجیاگ لەوەخت گونجیاگ.
تیمەگە بیاننامەیل كەشوهەوا ئەرا پەنجا شار لەجهان گردەو کردن، لە ماوەی کانون یەکەم و ئادار ٢٠٢٠ .
توێژینەوەگە ئاماژەدا ک ٨ شار وەڕاسی ڤایرۆسەگە لەناویان بڵاوەبوی، ئەوانیش؛ دایگۆ لە کۆریای باشووری، مەدرید لە ئیسپانیا، میلانۆ لەئیتالیا، پاریس لە فەڕەنسا، قوم لە ئیران، سیاتڵ لە ئەمریکا، تۆکیۆ لە یابان، ووهان لە چین.
لیکۆڵینەوەگە بەراورد ئەو شارەیلە وەل ٤٢ شار تر کرد ک کاریگەری ڤایڕۆسەگە نەدین، لە مانگ تەشرین دویەم تا ئادار ٢٠٢٠ بڵاوبوین کۆڕۆنا فرەتربوی لەوهەیشت شارە ک باسی کریا، ک گشتی کەفێدە شوین تەسکیگ لە هێڵەیل پانی، ناونی ٣٠ و ٥٠ پلە وەرەو باکوور.
هەرلیوا، لە خود ماوەگە، ڤایڕۆس کۆڕۆنا سەرنەکەفت لە بڵاوەبوین گەورایگ لە ناوچەیل باکوور، جوور مۆسکۆ لە روسیا، ک هالە پلەی ٥٦ وەرەو باکوور، ونەیش لە ناوچەیل باشوور ئەو شوینە جوور بانکوک لە تایلەند، ک کەفێدە پلەی ١٣،٧ وەرەو باکوور، وەگورەی رۆژنامەگە.
