توركيا.. شارەوانی ئیستەنبوڵ "ئیمام ئۆغڵو" دەرکەێد و کەسیگ ترەک لە شوینی دانەێد
شەفەق نیوز/ ئەنجومەن شارەوانی شار ئیستەنبوڵ تورکیا، ئمڕوو چوارشەممە، نوری ئەسڵان هەڵوژان جویر سەرۆک وەختانە ئەرا وەڕیەوبردن شارەگە، دویای زیندانیکردن ئەکرەم ئیمام ئۆغڵو سەرۆک شارەوانی، لەبان تاوانەیل گەندەڵی.
میدیایل تورکی وتن: ئەنجومەن شارەوانی ئیستەنبوڵ کە ئۆپۆزسیۆن بەێدەی ریەو، ئەندامەیلی کە شمارەیان 314 کەسە "ئەسڵان" ئەرا سەرۆکایەتی شی شارەوانی ئیستەنبوڵ پەسەن کرد نە پشتگیریکردن 177 دەنگ، و بڕیارە ئەسڵان کاروبار شارەگە ئەرا ئەو ماوە وەڕیەو بوەێد کە ئەرا ئیمام ئۆغڵو مەنیەسەو.
رووژ یەکشەممەی گوزەشتە، وەزارەت ناوخۆی تورکیا وسانن کار ئەکرەم ئیمام ئۆغڵو جویر سەرۆک شارەوانی ئیستەنبوڵ راگەیان، دویای دەرچگن فەرمان دەسگیرکردنی لەبان کارەیلیگ گەندەڵی.
لەبان ئەوە، ناڕەزایی لە تورکیا وەردەوامە، و دەسەڵاتەیل زیاتر لە 1400 کەس لە خوەینشاندان لە دەسگیر کرد، لە وەختیگ جویلەی فراوانیگ وە شەرمەزارکردن دەسگیرکردن سەرۆک شارەوانی دەسوەپی کرد.
ناڕەزایەیل ئۆپۆزسیۆن لە تورکیا وتن: ئامادەن ئەرا وەردەوامی اوو خوەینشاندانە کە دویای زیندانیکردن ئەکرەم ئیمام ئۆغڵو دەسوەپی کرد، هەرچەن وە بڕەو دەسگیر کریەن و بوودە وەردەوەردە وەرد پولیس.
رووژ دووشەممەی گوزەشتە، رەجەب تەییب ئەردۆغان سەرۆک تورکیا، دووپات کرد کە پەڵپیان شکست تیەرێد.
